លោក Antonio Guterres អគ្គលេខាធិការអង្គការសហប្រជាជាតិ បានថ្លែងអំពីជម្លោះសកលដែលកំពុងបន្តកើតមាន ក្នុងអំឡុងសន្និសីទសារព័ត៌មានមួយមុនកិច្ចប្រជុំកំពូលG20 នៅប្រទេសអាហ្វ្រិកខាងត្បូង កាលពីថ្ងៃសុក្រ ទី២១ ខែវិច្ឆិកា។

ទាក់ទងទៅនឹងរបាយការណ៍នៃផែនការសន្តិភាពចំនួន២៨ចំណុចសម្រាប់អ៊ុយក្រែន ដែលគាំទ្រដោយលោកប្រធានាធិបតី Trump លោកGuterres បាននិយាយថា ពុំមានសំណើជាផ្លូវការណាមួយត្រូវបានបង្ហាញនោះទេ។ លោកបានថ្លែងថា «យើងមិនដឹងថាផែនការសន្តិភាពនោះជាអ្វីទេ។ ខ្ញុំទើបតែអាននៅក្នុងឯកសារថា រុស្ស៊ីពុំទាន់ទទួលបានផែនការសន្តិភាពណាមួយនៅឡើយ»។

លោកបានសង្កត់ធ្ងន់ថា ដំណោះស្រាយណាមួយត្រូវតែធានាបាន «សន្តិភាពដ៏យុត្តិធម៌ ប្រកបដោយចីរភាព និងទូលំទូលាយ» ដោយគោរពបូរណភាពទឹកដីរបស់អ៊ុយក្រែន ស្របតាមធម្មនុញ្ញអង្គការសហប្រជាជាតិ និងសេចក្តីសម្រេចរបស់មហាសន្និបាត។

ចំពោះសាធារណរដ្ឋប្រជាធិបតេយ្យកុងហ្គោ លោក Guterres បានអំពាវនាវឱ្យមានបទឈប់បាញ់ជាបន្ទាន់។ លោកបាននិយាយថា «អាទិភាពរបស់យើងត្រូវតែបញ្ឈប់ការប្រយុទ្ធគ្នា» ដោយនិយាយសំដៅទៅលើការចរចានៅទីក្រុងវ៉ាស៊ីនតោន និងទីក្រុងដូហា។ លោកបានជំរុញឱ្យមានវឌ្ឍនភាពក្នុងពេលដំណាលគ្នាឆ្ពោះទៅរកដំណោះស្រាយនយោបាយដែលគោរពបូរណភាពទឹកដីរបស់សាធារណរដ្ឋប្រជាធិបតេយ្យកុងហ្គោ។