ការអត្ថាធិប្បាយបង្កហេតុរបស់នាយករដ្ឋមន្ត្រីជប៉ុន Sanae Takaichi អំពីតំបន់តៃវ៉ាន់របស់ប្រទេសចិន បានបង្កើនការព្រួយបារម្ភនៅក្នុងប្រទេសជប៉ុនអំពីការបាត់បង់ទីផ្សារចិន។

នៅក្នុងបទសម្ភាសន៍ជាមួយបណ្តាញទូរទស្សន៍សកលចិន (CGTN) លោក Toshiyuki Yamamoto អនុប្រធានវិទ្យាស្ថានសម្ភារៈ និងប្រព័ន្ធសម្រាប់និរន្តរភាព (IMaSS) នៅសាកលវិទ្យាល័យ Nagoya បាន សម្តែងការព្រួយបារម្ភយ៉ាងខ្លាំងអំពីរបៀបដែលទំនាក់ទំនងដ៏តានតឹងរវាងជប៉ុន និងចិន នឹងរារាំងវិស័យសេដ្ឋកិច្ចសំខាន់ៗ។

លោក Yamamoto បាននិយាយថា៖«ក្នុងស្ថានភាពនេះ អ្នកទេសចរចិនជាច្រើន កំពុងឈប់មកប្រទេសជប៉ុន ហើយបន្ទាប់មកវាក៏បណ្តាលឲ្យប៉ះពាល់ដល់ឧស្សាហកម្មទេសចរណ៍ នៅក្នុងប្រទេសជប៉ុនផងដែរ។ ឧស្សាហកម្មរថយន្ត ដូចដែលអ្នកបានលើកឡើង យើងមានទីផ្សារល្អនៅក្នុងប្រទេសចិន រហូតមកដល់ពេលនេះ។ ប៉ុន្តែយើងខ្លាចបាត់បង់ទីផ្សារដ៏ធំនេះពីភាគីជប៉ុន ប៉ុន្តែប្រទេសចិន ក៏កំពុងនាំចេញសម្ភារៈផងដែរ។ ដូច្នេះយើងពិតជាព្រួយបារម្ភអំពីបញ្ហានេះ។

ការព្រួយបារម្ភនេះ កើតឡើង នៅពេលដែលប្រទេសចិនរិះគន់យ៉ាងខ្លាំងចំពោះការអត្ថាធិប្បាយរបស់លោកស្រី Takaichi អំពីកោះតៃវ៉ាន់ ដោយក្រសួងពាណិជ្ជកម្មចិន បានព្រមានថា ការលើកឡើងទាំងនេះ កំពុងបំផ្លាញយ៉ាងធ្ងន់ធ្ងរដល់មូលដ្ឋានគ្រឹះនយោបាយនៃទំនាក់ទំនងចិន-ជប៉ុន និងធ្វើឲ្យប៉ះពាល់ដល់ពាណិជ្ជកម្ម និងកិច្ចសហប្រតិបត្តិការទ្វេភាគី។

ការលើកឡើងយ៉ាងច្បាស់របស់លោកស្រី Takaichi អំពីការចូលរួមរបស់យោធាជប៉ុន នៅក្នុងច្រកសមុទ្រតៃវ៉ាន់ ក៏បានទាក់ទាញប្រតិកម្មយ៉ាងខ្លាំងពីអន្តរជាតិផងដែរ ដោយអ្នករិះគន់បានចោទប្រកាន់លោកស្រីថា បានធ្វើឲ្យរស់ឡើងវិញនូវវោហាសាស្ត្រយោធានិយម និងបង្កើនភាពតានតឹងក្នុងតំបន់៕