ពិធីបរិច្ចាគមួយ ត្រូវបានធ្វើឡើងកាលពីថ្ងៃព្រហស្បតិ៍នៅក្នុងជំរំ Far'a នៅភាគខាងជើងតំបន់វេសបែង( West Bank) ដើម្បីចែកចាយសម្ភារៈសង្គ្រោះរដូវរងាពីប្រទេសចិនដល់គ្រួសារប៉ាឡេស្ទីន។

សម្ភារៈទាំងនេះ ត្រូវបានបរិច្ចាគដោយការិយាល័យចិននៅប៉ាឡេស្ទីន តាមរយៈមូលនិធិរបស់លោក ម៉ាខ្មូដ អាបាស (Mahmoud Abbas)។

លោក Zeng Jixin ប្រធានការិយាល័យជំនួយនេះ បានថ្លែងក្នុងពិធីនោះថា ប្រទេសចិនគាំទ្រយ៉ាងពេញទំហឹងចំពោះបុព្វហេតុដ៏យុត្តិធម៌របស់ប្រជាជនប៉ាឡេស្ទីន ក្នុងការស្តារសិទ្ធិជាតិស្របច្បាប់របស់ពួកគេឡើងវិញ តែងតែឈរនៅជាមួយប្រជាជនប៉ាឡេស្ទីន និងផ្តល់ជំនួយមនុស្សធម៌ និងអភិវឌ្ឍន៍ ដល់ភាគីប៉ាឡេស្ទីន តាមដែលអាចធ្វើទៅបាន។

លោក Zeng បាននិយាយថា ប្រទេសចិនជឿជាក់ជានិច្ចថា ការអនុវត្តដំណោះស្រាយរដ្ឋពីរ គឺជាមាគ៌ាតែមួយគត់ដែលអាចសម្រេចបានចំពោះការដោះស្រាយដ៏ទូលំទូលាយ យុត្តិធម៌ និងយូរអង្វែងនៃបញ្ហាប៉ាឡេស្ទីន។

លោកបានបន្តថា ប្រទេសចិនបានរៀបចំសកម្មភាពបរិច្ចាគរដូវរងា នៅក្នុងជំរំជនភៀសខ្លួនជាច្រើន នៅទូទាំងដែនដីប៉ាឡេស្ទីនរយៈពេល ៤ឆ្នាំ ជាប់ៗគ្នា ហើយការបរិច្ចាគភួយ និងម៉ាស៊ីនកម្តៅអគ្គិសនី នៅឆ្នាំនេះ ត្រូវបានគេរំពឹងថា នឹងផ្តល់អត្ថប្រយោជន៍ដល់គ្រួសារជនភៀសខ្លួន និងគ្រួសារដែលមានប្រាក់ចំណូលទាបប្រហែល ២.០០០ គ្រួសារនៅក្នុងខេត្តចំនួន ៤ នៃតំបន់វេសបែងគឺ ខេត្តTubas, Jenin, Tulkarm និង Hebron៕