​បារាំង៖ ប្រធានាធិបតី​បារាំង​លោក Emmanuel Macron បាន​ប្រកាស​កាលពី​ថ្ងៃ​ពុធ​ថា អឺរ៉ុប​ត្រូវការ​គោលនយោបាយ​ក្នុង​អវកាស​ដ៏​មោះ​មុត ដោយ​ព្រមាន​ថា ​អធិបតេយ្យភាព​របស់​អឺរ៉ុប​នឹង​មាន​បញ្ហា ប្រសិនបើ​សហភាព​នេះ​ឈរ​នៅ​ពីក្រោយ​ប្រទេស​មហាអំណាច ​គូប្រជែង​ក្នុង​វិស័យ​សំខាន់​សម្រាប់​ការប្រកួតប្រជែង​បច្ចេកវិទ្យា វិទ្យាសាស្ត្រ និង​យោធា​។

ថ្លែង​នៅ​ក្នុង​កិច្ចប្រជុំ​នៅ​ទីក្រុង Toulouse ប្រទេស​បារាំង លោក Macron បាន​និយាយ​ថា ព្រឹត្តិការណ៍​ថ្មីៗ​បាន​បង្ហាញ​ពី​សារៈសំខាន់​ ក្នុង​ការ​តាមដាន​សកម្មភាព​កងទ័ព​ពី​គន្លង​តារា​វិថី ដែល​លោក​និយាយ​យោង​ទៅលើ​រូបភាព​ផ្កាយរណប​ បង្ហាញ​ពី​ការ​ដាក់​ពង្រាយ​កងទ័ព​របស់​​រុស្ស៊ី​នៅ​ជិត​ប្រទេស​អ៊ុយ​ក្រែ​ន ដែល​បង្កើន​ការ​ព្រួយ​បារម្ភ​ពី​ការឈ្លានពាន​ដែល​នឹង​ជិត​មកដល់​។ លោក Macron និយាយ​ថា អឺរ៉ុប​មាន​កំណត់​ត្រា​រឹងមាំ នៅ​ពេល​និយាយ​អំពី​ការ​បាញ់​បង្ហោះ​ផ្កាយរណប​សម្រាប់​ទូរគមនាគមន៍ សេវាកម្ម​កំណត់​ទីតាំង សកល និង​ការស្រាវជ្រាវ​វិទ្យាសាស្ត្រ​។

ប៉ុន្តែ​វា​បាន​ដើរ​យឺត​ជាង​គូប្រជែងដូចជា​សហរដ្ឋអាមេរិក រុស្ស៊ី និង​ចិន លើ​ការហោះហើរ​នៅ​អវ​កាស​ដោយ​គ្មាន​សមត្ថភាព ក្នុង​ការ​ចាប់ផ្តើម​បេសកកម្ម​ក្រុម​អវ​កាស​យានិក​ផ្ទាល់ខ្លួន​។ ប្រធាន​ទីភ្នាក់ងារ​អវកាស​អឺរ៉ុប​កាលពី​ខែ​មុន បាន​គាំទ្រ​ការ​អំពាវនាវ​ឱ្យ​មាន​ការ​អភិវឌ្ឍ​យានអវកាស​ដែល​មាន​អវកាស​យានិក​ផ្ទាល់ខ្លួន ទោះបីជា​ប្រទេស​ជា​សមាជិក​មិនទាន់​យល់ព្រម​ក៏ដោយ​។ ទាក់ទង​ទៅ​នឹង​ឧស្សាហកម្ម​អវកាស​លោក Macron និយាយ​ថា អឺរ៉ុប​ប្រឈមមុខ​នឹង​ការ​ប្រជែង​មិន​ត្រឹម​តែ​ពី​ប្រទេស​មហាអំណាច​ប៉ុណ្ណោះ​ទេ ប៉ុន្តែ​ក៏​មាន​គូប្រជែង​ដែល​កំពុង​លេចធ្លោ​ដូចជា​ប្រទេស​ឥណ្ឌា និង​ក្រុមហ៊ុនឯកជន​ដូចជា Blue Origin និង SpaceX៕

អត្ថបទ៖ ប៊ុនថន