លោកប្រធានាធិបតី Donald Trump បាននិយាយថាផែនការរបស់សហរដ្ឋអាមេរិកដើម្បីបញ្ចប់សង្គ្រាមរុស្ស៊ី-អ៊ុយក្រែន មិនមែនជាការផ្តល់ជូនចុងក្រោយ របស់លោកសម្រាប់ទីក្រុងគីវទេ បន្ទាប់ពីបណ្ដាសម្ព័ន្ធមិត្តអ៊ុយក្រែន បានសម្តែងការព្រួយបារម្ភអំពីសំណើនោះ។

កាលពីព្រឹកថ្ងៃសៅរ៍ មេដឹកនាំមកពីអឺរ៉ុប កាណាដា និងជប៉ុន បាននិយាយថាផែនការនេះមានចណុចរួមផ្សំ ចាំបាច់សម្រាប់សន្តិភាពដ៏យុត្តិធម៌ និងយូរអង្វែង ប៉ុន្តែនឹងត្រូវការការងារបន្ថែម ដោយលើកឡើងពីការព្រួយបារម្ភអំពីការផ្លាស់ប្តូរព្រំដែន និងការកំណត់ចំនួនកងទ័ពអ៊ុយក្រែន។

នៅថ្ងៃអាទិត្យ៣២វិច្ឆិកានេះ មន្ត្រីសន្តិសុខមកពីចក្រភពអង់គ្លេស បារាំង អាល្លឺម៉ង់ សហរដ្ឋអាមេរិក និងអ៊ុយក្រែន នឹងជួបគ្នានៅទីក្រុងហ្សឺណែវ ប្រទេសស្វីស។

ចំណែកប្រធានាធិបតី Volodymyr Zelenskyy មុននេះ បានព្រមានថាអ៊ុយក្រែនប្រឈមនឹង ពេលវេលាដ៏លំបាកបំផុតមួយក្នុងប្រវត្តិសាស្ត្ររបស់អ៊ុយក្រែន ជុំវិញសម្ពាធរបស់សហរដ្ឋអាមេរិកក្នុងការទទួលយកផែនការដែលត្រូវបានគេមើលឃើញថាអំណោយផលដល់ទីក្រុងមូស្គូ។

លោក Trump បានផ្តល់ឱ្យអ៊ុយក្រែនរហូតដល់ថ្ងៃទី២៧ ខែវិច្ឆិកា ដើម្បីទទួលយកផែនការ ២៨ ចំណុច ខណៈប្រធានាធិបតីរុស្ស៊ី Vladimir Putin បាននិយាយថាផែនការនោះអាចជាមូលដ្ឋានសម្រាប់ការដោះស្រាយជម្លោះជាច្រើនឆ្នាំមកនេះ។ 

នៅពេលសួរកាលពីថ្ងៃសៅរ៍ថាតើសេចក្តីព្រាងផែនការបច្ចុប្បន្នជាការផ្តល់ជូនចុងក្រោយរបស់លោកសម្រាប់អ៊ុយក្រែនឬអត់ លោក Trump បានប្រាប់ក្រុមអ្នកសារព័ត៌មាននៅឯសេតវិមានថា អត់ទេ នោះមិនមែនជាការផ្តល់ជូនចុងក្រោយរបស់លោកនោះទេ៕