ប្រធានកិត្តិយសសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តកំពង់ស្ពឺ លោកជំទាវ ម៉េង វ៉ាន់ដានីន ជាម ច័ន្ទសោភ័ណ បានលើក​ទឹកចិត្ត​ប្រជា​ពលរដ្ឋ​កំពុង​ស្នាក់​នៅ​ភៀស​សឹក​ឱ្យ​អត់​ធ្មត់ ហើយបន្តជឿជាក់លើរាជរដ្ឋាភិបាលក្នុងការដឹកនាំនិងដោះស្រាយជម្លោះព្រំដែន។

លោកជំទាវបានលើកទឹកចិត្តដល់ពលរដ្ឋភៀសសឹកបែបនេះ ក្នុងឱកាសដឹកនាំ សមាជិកា​នៃ​សមាគម​នារី​ខេត្តចុះជួបសំណេះសំណាល និងសួរសុខទុក្ខបងប្អូនប្រជាពលរដ្ឋប្រមាណ ៧៦១ គ្រួសារ កំពុងស្នាក់នៅភៀសសឹក ដែលមកពីភូមិព្រៃចាន់ និងភូមិជោគជ័យ ឃុំអូរបីជាន់ ស្រុក​អូរ​ជ្រៅ ​ខេត្តបន្ទាយមានជ័យ នៅថ្ងៃទី២២ ខែវិច្ឆិកា ឆ្នាំ២០២៥នេះ។

ក្នុងឱកាស​នោះ លោកជំទាវ ម៉េង វ៉ាន់ដានីន ជាម ច័ន្ទសោភ័ណ បានលើកឡើង​ពី​កិច្ច​ខិតខំ​ប្រឹង​ប្រែង​របស់​ប្រមុខរាជរដ្ឋាភិបាល ដែលជាជំហានវិជ្ជមានដ៏សំខាន់ និងជាប្រវត្តិសាស្រ្ត​ក្នុង​ការ​ដោះស្រាយ​ជម្លោះព្រំដែនជាមួយប្រទេសថៃ ក្រោមយុទ្ធសាស្រ្ត "ស្ងាត់តែមិនស្ងៀម" របស់​សម្តេច​ធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា រហូតទទួលបានលទ្ធផលផ្លែផ្កា ដោយ​សម្រេច​បាន​ការ​អនុវត្តសេចក្តីថ្លែងការណ៍រួមស្តីពីសន្តិភាពរវាង កម្ពុជា និងថៃ នៅប្រទេសម៉ាឡេស៊ី ក្រោម​វត្តមា​នលោក ដូណាល់ ត្រាំ ប្រធានាធិបតីសហរដ្ឋអាមេរិក។

លោក​ជំទាវបន្ថែមថា លទ្ធផលដែលសម្រេចបាននូវការថ្លែងការណ៍រួមស្តីពីសន្តិភាពរវាងកម្ពុជា-ថៃនេះ គឺកើតចេញការខិតខំប្រឹងប្រែងឥតឈប់ឈររបស់សម្តេចធិបតី ក្នុងនាម​ជា​ប្រមុខ​រាជ​រដ្ឋាភិបាល​ និងក្រុមការងារ ដើម្បីស្វែងរកសន្តិភាពតាមបន្ទាត់ព្រំដែន ឈានឆ្ពោះ​ទៅ​រក​ប្រក្រតី​ភាព​ឡើង​វិញ​នូវទំនាក់ទំនងកម្ពុជា-ថៃ ដែលជាកត្តាចាំបាច់សម្រាប់ការរស់នៅរបស់ប្រជាពលរដ្ឋ ក៏​ដូចជាការអភិវឌ្ឍទៅមុខរបស់ប្រទេសកម្ពុជា។ តែដោយមហិច្ឆតាឈ្លានពានរបស់ប្រទេសថៃ បាន​រំលោភលើកិច្ចឈប់បាញ់ ហើយបន្តការឈ្លានពានមកលើកម្ពុជា និងបានធ្វើ​ឱ្យ​ប្រជាព​លរដ្ឋ​ស្លូត​ត្រង់​ត្រូវបង្ខំចិត្តចាកចេញពីលំនៅដ្ឋានមករស់នៅក្នុងជំរំជនភៀសសឹក។ ក្នុងនោះ​លោក​ជំទាវ​ក៏​បាន​សម្តែង​ការ​ឈឺ​ចាប់​ចំពោះ​ទាហាន​ថៃ​ដែល​បាន​ធ្វើ​ការ​បាញ់​ប្រហារ​មក​លើ​ប្រជា​ពលរដ្ឋ​ស្លូត​ត្រង់​ បណ្តាលឱ្យស្លាប់ម្នាក់និងរបួស៣នាក់កាលពីពេលកន្លងមកផងដែរ៕ អត្ថបទ៖ បាន សុខរិទ្ធិ