ប្រជាពលរដ្ឋយ៉ាងច្រើនកុះករមកពីតាមបណ្តាភូមិឃុំ​ក្នុងមូលដ្ឋានស្រុកព្រះនេត្រព្រះ ខេត្ត​បន្ទាយ​មាន​ជ័យ​ដែល​ជា​ពលករ​ចំណាក​ស្រុក​វិល​ត្រឡប់​ម​ក​ពី​ប្រទេស​ថៃ​ បាន​នាំ​គ្នាម​ក​ទទួល​ការ​ចុះ​ឈ្មោះ​ផ្ទាល់​ជា​មួយ​ក្រុម​ហ៊ុន​ ដើម្បី​ជ្រើ​ស​រើស​ទទួល​បាន​ជំនាញ​ការងារ​ធ្វើ​ដែល​ខ្លួន​ពេញ​ចិត្ត​ក្នុង​ឱកាសពិព័រណ៍​ការងារ សន្តិសុខសង្គម និងបណ្តុះបណ្តាលវិជ្ជាជីវៈ ដែល​ពិធីនេះ​ប្រារព្ធ​ធ្វើ​ឡើង​នៅ​ទី​តាំង​បរិវេណសាលាស្រុកព្រះនេត្រព្រះ ខេត្តបន្ទាយមានជ័យ នៅព្រឹកថ្ងៃទី២៣ ខែវិច្ឆិកា ឆ្នាំ២០២៥នេះ។

ប្រជាពលរដ្ឋដែលជាពលករមកពីប្រទេសថៃ បានសម្តែងការត្រេកអរសប្បាយរីករាយ និង​គាំទ្រ​យ៉ាង​ខ្លាំង​ចំពោះការរៀបចំពិព័រណ៌ការងារនៅខេត្តបន្ទាយមានជ័យនេះ ដើម្បីជួយ​ដល់​ពួក​គាត់​ពេល​វិល​ត្រឡប់​មក​ស្រុក​កំណើត​វិញ​ឱ្យ​មាន​ការងារ​ធ្វើ​គ្រប់​ៗ​គ្នា​ទៅ​តាម​ជំនាញ​ដែល​ខ្លួន​ពេញ​ចិត្ត​។

ប្រជាពលរដ្ឋដែលទើបមកពីប្រទេសថៃបានលើកឡើថា ពួក​គាត់​មិន​ចង់​ត្រឡប់​ទៅ​ធ្វើ​ការ​នៅ​ឯ​ប្រទេស​ថៃ​វិញទេ ដោយសារការងារនៅប្រទេសថៃ គឺមានការលំបាក ណាមួយត្រូវ​ឃ្លាត​ឆ្ងាញ​ពី​ក្រុម​គ្រួសារផ​ងដែរ។

សូមបញ្ជាក់ បច្ចុប្បន្ននេះ ក្រសួងការងារ និង​បណ្តុះ​បណ្តាល​វិជ្ជា​ជីវៈ​បាន​ផ្តល់​ឱកាស​ការងារ​រៀប​ម៉ឺន​កន្លែង​សម្រាប់បងប្អូនពលករដែលវិលត្រឡប់មកពីប្រទេសថៃវិញ ដើម្បីទទួល​បាន​ការងារ​ធ្វើ​ភ្លាម​ៗ​ទៅ​តាមជំនាញដែលខ្លួនពេញចិត្ត និងទទួលបានប្រាក់ខែសមរម្យ។ នេះគឺជាការ​យក​ចិត្ត​ទុក​ដាក់​ និងគិតគូរខ្ពស់ពីសម្តេចធិបតីនាយករដ្ឋមន្រ្តី ចំពោះប្រជា​ពលរដ្ឋ​ដែល​ជា​ពលករ​គ្រប់​ៗ​គ្នា​ដែល​វិល​ត្រឡប់មកពីប្រទេសថៃវិញ៕ អត្ថបទ៖ ឃិន សារិទ្ធ