សារព័ត៌មាននានា បានរាយការណ៍ដោយសំអាងដល់អាជ្ញាធរគ្រប់គ្រងគ្រោះមហន្តរាយ​វៀតណាមថា ចំនួនអ្នកស្លាប់ដោយសារទឹកជំនន់ដ៏ធ្ងន់ធ្ងរ និងបំណាក់ដី ក្រោយភ្លៀងធ្លាក់ខ្លាំងក្នុងប្រទេសវៀតណាមភាគកណ្ដាលបានកើនឡើងដល់៩០នាក់ គិតត្រឹមរសៀលថ្ងៃអាទិត្យ២៣វិច្ឆិកាសប្ដាហ៍នេះ ។

ភ្លៀងធ្លាក់ឥតឈប់ឈរបានវាយប្រហារភាគកណ្តាលរបស់ប្រទេសវៀតណាមចាប់តាំងពីចុងខែតុលាមក ហើយគោលដៅវិស្សមកាលដ៏ពេញនិយមនានា ត្រូវបានវាយប្រហារដោយទឹកជំនន់ជាច្រើនលើក។ 

ប្លុកផ្សេងៗរបស់ទីក្រុងទាំងមូលត្រូវបានជន់លិចនៅសប្តាហ៍នេះ ក្នុងតំបន់ឆ្នេរសមុទ្រ ញ៉ាត្រាង(Nha Trang) ខណៈបំណាក់ដីដ៏សាហាវបានវាយប្រហារផ្លូវតាមភ្នំជុំវិញមជ្ឈមណ្ឌលទេសចរណ៍ដាឡាត (Da Lat )។

ក្រសួងបរិស្ថានបាននិយាយក្នុងសេចក្តីថ្លែងការណ៍មួយដែលចេញផ្សាយនៅថ្ងៃអាទិត្យនេះ ថាចំនួនអ្នកស្លាប់បានកើនឡើងដល់៩០នាក់ នៅទូទាំងខេត្តចំនួន៦ ចាប់តាំងពីថ្ងៃអាទិត្យសប្ដាហ៍មុន ខណៈបន្តស្វែងរកមនុស្ស ១២ នាក់ផ្សេងទៀតដែលនៅតែបាត់ខ្លួន។

ក្រសួងបានបន្តថាអ្នកស្លាប់ជាង៦០នាក់ ចាប់តាំងពីថ្ងៃ១៦វិច្ឆិកាមក ត្រូវបានកត់ត្រាក្នុងខេត្ត        ដាក់ឡាក់ (Dak Lak) ជាទីដែលផ្ទះសម្បែងរាប់ម៉ឺនខ្នងត្រូវបានទឹកជនន់លិច។ 

ក្រុមអ្នកជួយសង្គ្រោះនៅតែកំពុងជួយនាំមនុស្សចេញពីចុងឈើ និងដំបូលផ្ទះ ខណៈទឹកជំនន់បានស្រកនៅទីនោះកាលពីថ្ងៃសុក្រ។

ក្រសួងបរិស្ថានខាងលើបានបន្ថែមថា ផ្លូវហាយវេជាច្រើននៅតែមិនអាចឆ្លងកាត់បាននៅថ្ងៃសៅរ៍ ហើយមនុស្ស ៣០០.០០០ នាក់គ្មានអគ្គិសនីប្រើប្រាស់ បន្ទាប់ពីការដាច់ចរន្តអគ្គិសនីដែលដំបូងឡើយបានប៉ះពាល់ដល់មនុស្សជាងមួយលាននាក់៕