ក្រុមហ៊ុនអាកាសចរណ៍អន្តរជាតិចំនួនបីបានលុបចោលជើងហោះហើររបស់ខ្លួនដែលចេញដំណើរពីប្រទេសវ៉េណេស៊ុយអេឡាកាលពីថ្ងៃសៅរ៍ ២២ វិច្ឆិកា មួយថ្ងៃបន្ទាប់ពីរដ្ឋបាលអាកាសចរណ៍សហព័ន្ធសហរដ្ឋអាមេរិកបានព្រមានក្រុមហ៊ុនអាកាសចរណ៍សំខាន់ៗអំពីស្ថានភាពគ្រោះថ្នាក់ ដែលអាចកើតមាន នៅពេលហោះហើរលើប្រទេសនេះ។

ក្រុមមន្ត្រីអាមេរិក៤រូប និយាយថា អាមេរិក គ្រោងបើកការវាយប្រហារដំណាក់កាលថ្មីពាក់ព័ន្ធនឹងប្រទេសវ៉េណេស៊ុយអេឡាក្នុងពេលប៉ុន្មានថ្ងៃខាងមុខ ខណៈរដ្ឋបាលលោក Trump បង្កើនសម្ពាធកាន់តែខ្លាំងលើរដ្ឋាភិបាលប្រធានាធិបតី Nicolas Maduro។ 

ក្រុមហ៊ុនអាកាសចរណ៍ Gol របស់ប្រេស៊ីល ក្រុមហ៊ុនអាកាសចរណ៍ Avianca របស់កូឡុំប៊ី និងក្រុមហ៊ុនអាកាសចរណ៍ TAP Air Portugal របស់ព័រទុយហ្គាល់ បានលុបចោលជើងហោះហើររបស់ខ្លួនដែលចេញដំណើរពីទីក្រុង ការ៉ាកាស (Caracas) កាលពីថ្ងៃសៅរ៍ នេះបើយោងតាម Flightradar24 និងគេហទំព័រផ្លូវការរបស់អាកាសយានដ្ឋានអន្តរជាតិ Simon BolivarMaiquetia។ 

ក្រុមហ៊ុនអាកាសចរណ៍ Aeronautica Civil de Colombia បាននិយាយក្នុងសេចក្តីថ្លែងការណ៍មួយថា មានហានិភ័យដែលអាចកើតឡើងខ្ពស់ នៃការហោះហើរនៅក្នុងតំបន់ Maiquetia ដោយសារតែស្ថានភាពសន្តិសុខកាន់តែយ៉ាប់យ៉ឺន និងសកម្មភាពយោធាកើនឡើងនៅក្នុងតំបន់។

ក្រុមហ៊ុនអាកាសចរណ៍ TAP Air Portugal បានបញ្ជាក់ថា ខ្លួនបានលុបចោលជើងហោះហើររបស់ខ្លួនដែលបានកំណត់ពេលសម្រាប់ថ្ងៃសៅរ៍ និងថ្ងៃអង្គារក្រោយ។ ក្រុមហ៊ុនបានប្រាប់សារព័ទ៌មាន រ៉យទ័រថា ការសម្រេចចិត្តនេះធ្វើតាមព័ត៌មានដែលចេញដោយអាជ្ញាធរអាកាសចរណ៍សហរដ្ឋអាមេរិក ដែលបង្ហាញថាស្ថានភាពសុវត្ថិភាពក្នុងដែនអាកាសវ៉េណេស៊ុយអេឡាមិនត្រូវបានធានាទេ។  

ក្រុមហ៊ុនអាកាសចរណ៍ Iberia របស់អេស្ប៉ាញ ក៏បាននិយាយផងដែរថា ខ្លួនកំពុងលុបចោលជើងហោះហើរទៅកាន់ទីក្រុងរដ្ឋធានីការ៉ាកាស ចាប់ពីថ្ងៃចន្ទរហូតដល់មានការជូនដំណឹងបន្ថែម៕