យោងតាមការិយាល័យប្រព័ន្ធផ្សព្វផ្សាយរដ្ឋាភិបាលហ្កាហ្សា អ៊ីស្រាអែលបានរំលោភលើបទឈប់បាញ់នៅហ្កាហ្សាសម្របសម្រួលដោយសហរដ្ឋអាមេរិកយ៉ាងហោចណាស់ ៤៩៧ ដងក្នុងរយៈពេល ៤៤ ថ្ងៃ ដោយបានសម្លាប់ប្រជាជនប៉ាឡេស្ទីនរាប់រយនាក់ចាប់តាំងពីបទឈប់បាញ់ចូលជាធរមាននៅថ្ងៃទី ១០ ខែតុលា ។  

ជនស៊ីវិលប្រហែល ៣៤២ នាក់ត្រូវបានសម្លាប់នៅក្នុងការវាយប្រហារនានា ដោយភាគច្រើននៃអ្នកស្លាប់គឺជា កុមារ ស្ត្រី និងមនុស្សចាស់។  

ការិយាល័យនេះបាននិយាយនៅក្នុងសេចក្តីថ្លែងការណ៍មួយកាលពីថ្ងៃសៅរ៍ថា យើងថ្កោលទោសយ៉ាងខ្លាំងចំពោះការរំលោភបំពានយ៉ាងធ្ងន់ធ្ងរ និងជាប្រព័ន្ធជាបន្តបន្ទាប់នៃកិច្ចព្រមព្រៀងបទឈប់បាញ់ដោយអាជ្ញាធរកាន់កាប់អ៊ីស្រាអែល។   

ការិយាល័យខាងលើបានបន្ថែមថា ការបំពានទាំងនេះបង្កើតបានជាការរំលោភបំពានយ៉ាងធ្ងន់ធ្ងរលើច្បាប់មនុស្សធម៌អន្តរជាតិ និងពិធីសារមនុស្សធម៌ដែលភ្ជាប់ទៅនឹងកិច្ចព្រមព្រៀង។ ក្នុងចំណោមការរំលោភបំពានទាំងនេះ មាន ២៧ ករណីបានកើតឡើងនៅថ្ងៃសៅរ៍២២វិច្ឆិកា២០២៥ ដែលបណ្តាលឱ្យមនុស្សស្លាប់ ២៤ នាក់ និង៨៧ នាក់រងរបួស។ 

ការិយាល័យរបស់នាយករដ្ឋមន្ត្រីអ៊ីស្រាអែល Benjamin Netanyahu និយាយថា ខ្លួនបានបើកការវាយប្រហារចុងក្រោយទាំងនេះ បន្ទាប់ពីយុទ្ធជនហាម៉ាសម្នាក់ បានវាយប្រហារទាហានអ៊ីស្រាអែលនៅក្នុងទឹកដីដែលកាន់កាប់ដោយអ៊ីស្រាអែល នៅខាងក្នុងខ្សែបន្ទាត់លឿងរបស់ហ្កាហ្សា៕