លោកនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) បាន​បដិសេធ​ការ​ចោទ​ប្រកាន់​ពីការជ្រៀតជ្រែកក្នុងជម្លោះព្រំដែនរបស់ថៃជាមួយកម្ពុជា ដោយ​រក្សា​តួនាទី​អព្យាក្រឹត​របស់​ម៉ាឡេស៊ី ​ក្នុងការសម្របសម្រួលការចរចារវាងប្រទេសទាំងពីរ។

លោក Anwar បានថ្លែងក្នុងសន្និសីទសារព័ត៌មានមួយកាលពីថ្ងៃសៅរ៍ ២២ វិច្ឆិកាសប្ដាហ៍នេះ នៅ​ទី​ក្រុងចូហាណេស្បឺក(Johannesburg) ប្រទេសអាហ្វ្រិកខាងត្បូង ជាទីដែល​លោក​កំពុង​ចូល​រួម​កិច្ច​ប្រជុំកំពូល G20 ឆ្នាំនេះថា លោកសូមស្រាយបំភ្លឺឱ្យច្បាស់ ទីមួយ ក្នុងនាម​ជា​ប្រទេស​ជិត​ខាង​ប្រទេស​របស់លោកពិតជាមានការព្រួយបារម្ភពីជម្លោះនេះខ្លាំងណាស់ ប៉ុន្តែពួក​លោក​មិន​ពាក់​ព័ន្ធ​ឡើយ​។

លោកបានមានប្រសាសន៍ថា «យើងគ្រាន់តែសម្របសម្រួល - ដើម្បីជួយពួកគេ​ឱ្យ​សម្រេច​បាន​នូវ​ការ​ដោះស្រា​យ ឬដំណោះស្រាយចំពោះជម្លោះរបស់ពួកគេតែប៉ុណ្ណោះ។ យើងមិន​បាន​ផ្តល់​ការ​ណែ​នាំ​ជាក់លាក់ណាមួយដល់ប្រទេសទាំងពីរថាត្រូវដោះស្រាយជម្លោះបែបណានោះដែរ ដោយ​បន្ថែម​ថា​ប្រទេសទាំងពីរចាត់ទុកម៉ាឡេស៊ីជា «មិត្ត»។

លោក Anwar បានបន្ថែមថា ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump ) ក៏បាននិយាយជាមួយពួកគេដែរ។លោកថា នៅពេលរូបលោកធ្វើជាប្រធានកិច្ចប្រជុំ រវាង​ភាគី​ទាំងពីរ លោកបាននិយាយយ៉ាងច្បាស់អស់ហើយ។

លោកគិត​ថា​យើងមិន​គួរ​ត្រូវ​បាន​រារាំង​ពី​ភារកិច្ច​ចម្បង​របស់​យើង​ក្នុង​ការ​សម្រេច​បាន​សន្តិភាព​ដោយ​សារ​តែសេចក្តីថ្លែងការណ៍មួយចំនួនបង្កើតឡើងដោយបញ្ហាតូចតាច ដែលមិនពេញចិត្ត និង​ខកចិត្តនោះទេ។

ប្រតិកម្ម​របស់លោកបានកើតមាន​ឡើង​ក្រោយ​ក្រុម​បាតុករ​ថៃ​ជ្រុល​និយម​បាន​ប្រមូល​ផ្ដុំ​គ្នា​ធ្វើ​បាតុ​កម្ម​តវ៉ា​នៅខាងមុខស្ថានទូតម៉ាឡេស៊ី ក្នុងទីក្រុងបាងកក ដោយចោទប្រកាន់រូបលោកថា បាន​បំពាន​លើ​តួនាទីជាប្រធានអាស៊ាន និងលូកដៃចូល​កិច្ចការ​របស់​ថៃ​ដើម្បី​ការពារ​អធិបតេយ្យ​របស់​ខ្លួន​៕