គណៈប្រតិភូហាម៉ាសមួយក្រុមបានជួបលោក Hassan Rashad ប្រធានសេវាចារកម្មទូទៅរបស់អេហ្ស៊ីប នៅទីក្រុងគែរ(Cairo)កាលពីថ្ងៃអាទិត្យ ដើម្បីពិភាក្សាអំពីការវិវត្តទាក់ទងនឹងកិច្ចព្រមព្រៀងបទឈប់បាញ់នៅហ្កាហ្សាជាមួយអ៊ីស្រាអែល។

ក្រុមនេះនិយាយក្នុងសេចក្តីថ្លែងការណ៍មួយដោយមិនបានផ្តល់ព័ត៌មានលម្អិតបន្ថែមថា កិច្ចពិភាក្សានេះគ្របដណ្តប់លើការវិវឌ្ឍនៃកិច្ចព្រមព្រៀងបទឈប់បាញ់ ស្ថានភាពទូទៅនៅហ្កាហ្សា និងលក្ខណៈដំណាក់កាលទីពីរនៃកិច្ចព្រមព្រៀង។

គណៈប្រតិភូនេះរួមមានប្រធានក្រុមប្រឹក្សាមេដឹកនាំហាម៉ាស លោក Muhammad Darwish និងសមាជិកក្រុមប្រឹក្សា លោក Khaled Meshaal លោក Khalil al-Hayya លោក Nizar Awadallahលោក Zahir Jabarin និងសមាជិកការិយាល័យនយោបាយ លោក Ghazi Hamad។

ក្រុមហាម៉ាសបាននិយាយថា គណៈប្រតិភូបានបញ្ជាក់ជាថ្មីនូវ ការប្តេជ្ញាចិត្តរបស់ខ្លួនក្នុងការអនុវត្តដំណាក់កាលទីមួយនៃកិច្ចព្រមព្រៀង ប៉ុន្តែបានព្រមានថា ការរំលោភបំពានជាបន្តបន្ទាប់របស់អ៊ីស្រាអែលគំរាមកំហែងធ្វើឱ្យខូចកិច្ចព្រមព្រៀង។    

ក្រុមនេះបានអំពាវនាវឱ្យមានយន្តការច្បាស់លាស់មួយដែលត្រួតពិនិត្យដោយក្រុមអ្នកសម្របសម្រួល ដើម្បីរាយការណ៍អំពីការរំលោភបំពាន និងធានាឲ្យបាននូវចំណាត់ការភ្លាមៗ ដើម្បីបញ្ឈប់ការបំពានទាំងនោះដោយទប់ស្កាត់រាល់ជំហានឯកតោភាគីដែលបង្កើនភាពតានតឹង និងប៉ះពាល់ដល់កិច្ចព្រមព្រៀង។យោងតាមការិយាល័យប្រព័ន្ធផ្សព្វផ្សាយរដ្ឋាភិបាលហ្កាហ្សា កងកម្លាំងអ៊ីស្រាអែលបានសម្លាប់ជនជាតិប៉ាឡេស្ទីនចំនួន ៣៤២នាក់ និងរបួសរាប់រយនាក់ចាប់តាំងពីបទឈប់បាញ់កាលពីថ្ងៃទី១០តុលាឆ្នាំ២០២៥៕