យោងតាមអាជ្ញាធរគ្រោះមហន្តរាយ ទឹកជំនន់ឥតឈប់ឈរនៅទូទាំងតំបន់កណ្តាល និងតំបន់ខ្ពង់រាបកណ្តាលនៃប្រទេសវៀតណាមបានបង្កការខូចខាតយ៉ាងធ្ងន់ធ្ងរ ដោយបានសម្លាប់ ឬបាត់ខ្លួនមនុស្ស ១០២នាក់ ខណៈផ្ទះសម្បែងរាប់ម៉ឺនខ្នងត្រូវបានជន់លិច ឬបំផ្លាញ ។   

រដ្ឋាភិបាលវៀតណាម បានប៉ាន់ប្រមាណថា គ្រោះទឹកជំនន់ដែលបានកំពុងវាយប្រហារទូទាំងខេត្តចំនួន៥នាក់ បានបណ្ដាលឲ្យខាតបង់ថវិកាប្រមាណ ៣៤៣លានដុល្លារអាមេរិក ។   

របាយការណ៍មួយពីនាយកដ្ឋានគ្រប់គ្រង និងបង្ការគ្រោះមហន្តរាយជាតិ ដែលបានធ្វើបច្ចុប្បន្នភាព កាលពីថ្ងៃអាទិត្យ២៣វិច្ឆិកា បង្ហាញថាមានអ្នកស្លាប់ចំនួន ៩០នាក់ និងមនុស្ស ១២នាក់នៅតែបាត់ខ្លួន ដែលជាការកើនឡើងគួរឱ្យកត់សម្គាល់បើប្រៀបធៀបទៅនឹង ២៤ម៉ោងកន្លងទៅ ក្នុងពេលធ្វើបច្ចុប្បន្នភាពកាលពីព្រឹកថ្ងៃសៅរ៍ ២២វិច្ឆិកាចុងសប្ដាហ៍មុន មានចំនួនអ្នកស្លាប់ ៥៥នាក់ និងបាត់ខ្លួន ១៣នាក់។

ខេត្តដាក់ឡាក់ បានរងការប៉ះពាល់ធ្ងន់ធ្ងរបំផុត ដោយមានអ្នកស្លាប់ ៦៣នាក់ និងបាត់ខ្លួន ៨នាក់។

ខេត្ត ខាញ់ ហ័រ (Khanh Hoa ) បានរាយការណ៍ថាមានអ្នកស្លាប់ ១៤នាក់ និងបាត់ខ្លួនពីរនាក់ ខណៈខេត្ត ឡាំដុង (Lam Dong) បានកត់ត្រាអ្នកស្លាប់ ៥នាក់។ ខេត្តផ្សេងទៀតដែលមានមនុស្សស្លាប់ពីទឹកជំនន់រួមមាន ខេត្ត ក្វាងទ្រី (Quang Tri) ខេត្ត ធួធៀនហ៊ូវ (Thua Thien Hue) ខេត្តដាណាំង (Danang) និងខេត្ត យ៉ាឡាយ (Gia Lai)៕