បទសម្ភាសន៍របស់សារព័ត៌មានរ៉យទ័រជាមួយពលរដ្ឋអ៊ុយក្រែនមួយចំនួន ដែលរស់នៅសហរដ្ឋអាមេរិក បានឱ្យដឹងថា មនុស្សរាប់សិបម៉ឺននាក់ដែលភៀសខ្លួនពីសង្គ្រាមទៅកាន់សហរដ្ឋអាមេរិក កំពុងប្រឈមនឹងអនាគតមិនច្បាស់លាស់ ស្របពេលការបង្រ្កាបអន្តោប្រវេសន៍កាន់តែបង្កើនល្បឿន។ ពលរដ្ឋទាំងនោះកំពុងទន្ទឹងរង់ចាំរដ្ឋបាលរបស់លោកប្រធានាធិបតី Donald Trump សម្រេចជោគវាសនានៃកម្មវិធីមនុស្សធម៌មួយ ដែលអនុញ្ញាតឱ្យជនភៀសខ្លួនចេញពីសង្រ្គាមនៅអ៊ុយក្រែនប្រហែល ២៦ម៉ឺននាក់ ទៅជ្រកកោន និងធ្វើការនៅសហរដ្ឋអាមេរិក។

យោងតាមទិន្នន័យផ្ទៃក្នុងរបស់រដ្ឋាភិបាលអាមេរិក ដែលពិនិត្យដោយសារព័ត៌មានរ៉យទ័រ បានបង្ហាញថា រដ្ឋបាលលោក Trump បានផ្អាកដំណើរការនានាលើកម្មវិធីមនុស្សធម៌សម្រាប់អ៊ុយក្រែនមួយនេះ -- ដែលចាប់ផ្តើមឡើងដោយអតីតប្រធានាធិបតីមកពីបក្សប្រជាធិបតេយ្យ លោក Joe Biden -- ហើយការពន្យារពេលនេះ បានធ្វើឱ្យមនុស្សជិត ២សែននាក់ ប្រឈមនឹងការបាត់បង់ស្ថានភាពស្របច្បាប់នៃសិទ្ធិជ្រកកោន គិតត្រឹមថ្ងៃទី៣១ ខែមីនា ខាងមុខ។

កម្មវិធីមនុស្សធម៌ ដែលដាក់ចេញក្នុងខែមេសា ឆ្នាំ២០២២នេះ បានអនុញ្ញាតឱ្យជនជាតិអ៊ុយក្រែនជិត ២៦ម៉ឺននាក់ ចូលទៅអាមេរិក សម្រាប់ពេលពីរឆ្នាំដំបូង។ នោះគឺជាចំណែកតូចមួយប៉ុណ្ណោះបើធៀបនឹងជនភៀសខ្លួនអ៊ុយក្រែន ៥,៩លាននាក់ នៅទូទាំងពិភពលោក ដែលក្នុងនោះមាន ៥,៣លាននាក់ ស្ថិតនៅទ្វីបអឺរ៉ុប នេះបើយោងតាមតួលេខជនភៀសខ្លួនរបស់អង្គការសហប្រជាជាតិ។

រដ្ឋបាលលោក Trump បានផ្អាកដំណើរការលើសំណើ និងការស្នើបន្តរយៈពេលស្នាក់នៅ ក្រោមកម្មវិធីមនុស្សធម៌អ៊ុយក្រែន ក្នុងខែមករាកន្លងទៅ ដោយលើកឡើងពីហេតុផលសន្តិសុខ។ លោក Trump ធ្លាប់គំរាមបញ្ចប់កម្មវិធីនេះ ប៉ុន្តែនៅទីបំផុត លោកមិនបានបិទកម្មវិធីនោះទេ ហើយនៅក្នុងខែឧសភា ចៅក្រមសហព័ន្ធបានចេញដីការបង្គាប់ឱ្យមន្ត្រីអាមេរិកបន្តដំណើរការលើរឿងនេះ ប៉ុន្តែរបាយការណ៍បង្ហាញថា ចាប់តាំងពីពេលនោះមក មន្ត្រីអន្តោប្រវេសន៍អាមេរិក បានដំណើរការពាក្យស្នើសុំបន្តរស់នៅចំនួន ១.៩០០ច្បាប់ប៉ុណ្ណោះ សម្រាប់ជនជាតិអ៊ុយក្រែន និងសញ្ជាតិផ្សេងទៀត៕