បុគ្គលិកពេទ្យ និងមន្រ្តីជំនួយនៅក្នុងដែនដីហ្កាហ្សា បាននិយាយថា មន្ទីរពេទ្យនៅក្នុងទឹកដីប៉ាឡេស្ទីនដែលរងការបំផ្លិចបំផ្លាញមួយនេះ កំពុងអស់គ្រឿងផ្គត់ផ្គង់សំខាន់ៗទៅហើយ ក្រោមរលកថ្មីនៃការវាយប្រហារតាមអាកាសរបស់អ៊ីស្រាអែលឥតឈប់ឈរ ដែលបានសម្លាប់មនុស្សរាប់សិបនាក់ និងបង្ករបួសរាប់រយនាក់ ក្នុងប៉ុន្មានថ្ងៃថ្មីៗនេះ។

បុគ្គលិកវេជ្ជសាស្រ្ត បាននិយាយកាលពីថ្ងៃអាទិត្យ (២៣ វិច្ឆិកា) ថា ស្តុកវេជ្ជសាស្រ្តដូចជាសំណាញ់រុំរបួស ថ្នាំសម្លាប់មេរោគ ទែម៉ូម៉ែត្រ និងថ្នាំអង់ទីប៊ីយោទិចដ៏សំខាន់ កំពុងមានកម្រិតទាប។ លោក Mohammed Saqr នាយកផ្នែកគិលានុបដ្ឋាយិកានៅមន្ទីរពេទ្យ Nasser ក្នុងទីក្រុង Khan Younis និយាយថា “មន្ទីរពេទ្យនៅតែខ្វះខាតយ៉ាងធ្ងន់ធ្ងរនៃការផ្គត់ផ្គង់ និងឱសថភាគច្រើន”។

អង្គការមនុស្សធម៌នានា បានបញ្ជូនគ្រឿងផ្គត់ផ្គង់រាប់រយតោនទៅកាន់តំបន់ហ្កាហ្សា ចាប់តាំងពីបទឈប់បាញ់ដែលគាំទ្រដោយសហរដ្ឋអាមេរិក បានចូលជាធរមានកាលពីខែតុលាមក ប៉ុន្តែស្តុកឱសថ និងការផ្គត់ផ្គង់វេជ្ជសាស្រ្ត នៅតែមិនគ្រប់គ្រាន់។

លើសពីនេះ អាជ្ញាធរសុខាភិបាលហ្កាហ្សា បានរាយការណ៍ថា មានមនុស្សស្លាប់ជាង ៣០០នាក់ ក្នុងការវាយប្រហាររបស់អ៊ីស្រាអែល ចាប់តាំងពីបទឈប់បាញ់មក ហើយក្រុមគ្រូពេទ្យនិយាយថា មនុស្សមួយចំនួនធំកំពុងរងផលវិបាកនៃកង្វះអាហារូបត្ថម្ភ លក្ខខណ្ឌអាកាសធាតុដ៏អាក្រក់ កង្វះទីជម្រក និងការផ្ទុះជំងឺថ្មីៗ។ អំពើហិង្សាជាបន្តបន្ទាប់នៅហ្កាហ្សា បានបង្កភាពតានតឹងដល់បទឈប់បាញ់ ទោះបីជាភាគីជម្លោះទាំងពីរអះអាងថា ពួកគេប្តេជ្ញាចិត្តចំពោះកិច្ចព្រមព្រៀងនេះក៏ដោយ៕