រដ្ឋាភិបាលរបស់ប្រទេសឥណ្ឌា បាននិយាយកាលពីថ្ងៃអាទិត្យ ទី២៣ ខែវិច្ឆិកា ថា កាណាដា និងឥណ្ឌាបានព្រមព្រៀងចាប់ផ្តើមឡើងវិញកិច្ចចរចាដែលជាប់គាំងសម្រាប់កិច្ចព្រមព្រៀងពាណិជ្ជកម្មថ្មីមួយ បន្ទាប់ពីការពិភាក្សារវាងប្រទេសទាំងពីរដែលបានផ្អាកក្រោយជម្លោះការទូតកាលពីពីរឆ្នាំមុន។

លោកនាយករដ្ឋមន្ត្រី Mark Carney បានជួបជាមួយ នាយករដ្ឋមន្ត្រីឥណ្ឌា លោក Narendra Modi សម្រាប់ការពិភាក្សាទ្វេភាគីនៅខាងក្រៅកិច្ចប្រជុំកំពូលG20 នៅទីក្រុង Johannesburg ប្រទេសអាហ្វ្រិកខាងត្បូង។ សេចក្តីថ្លែងការណ៍ពីការិយាល័យនាយករដ្ឋមន្ត្រីឥណ្ឌាបាននិយាយថា «មេដឹកនាំទាំងពីរបានព្រមព្រៀងចាប់ផ្តើមការចរចាលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ (CEPA) ដែលមានមហិច្ឆតាខ្ពស់ ក្នុងគោលបំណងបង្កើនពាណិជ្ជកម្មទ្វេភាគីទ្វេដងរហូតដល់៥០ពាន់លានដុល្លារអាមេរិកនៅឆ្នាំ ២០៣០»។ លោក Carney បាននិយាយនៅក្នុងសារមួយនៅលើបណ្តាញ X ថា «លោកនាយករដ្ឋមន្ត្រី Narendra Modi និងខ្ញុំបានជួបគ្នានៅឯកិច្ចប្រជុំកំពូល G20 ហើយបានចាប់ផ្តើមការចរចាសម្រាប់កិច្ចព្រមព្រៀងពាណិជ្ជកម្មដែលអាចបង្កើនពាណិជ្ជកម្មទ្វេដង»។

«ឥណ្ឌាគឺជាប្រទេសមានសេដ្ឋកិច្ចធំបំផុតទីប្រាំរបស់ពិភពលោក ហើយនោះមានន័យថាជាឱកាសថ្មីដ៏ធំសម្រាប់បុគ្គលិក និងអាជីវកម្មកាណាដា»។ ភាគីទាំងពីរបានបញ្ជាក់ជាថ្មីនូវកិច្ចសហប្រតិបត្តិការនុយក្លេអ៊ែរស៊ីវិលយូរអង្វែងរបស់ខ្លួន និងបានលើកឡើងពីកិច្ចពិភាក្សាជាបន្តបន្ទាប់លើការពង្រីកកិច្ចសហការ រួមទាំងតាមរយៈការរៀបចំការផ្គត់ផ្គង់អ៊ុយរ៉ានីញ៉ូមរយៈពេលវែងផងដែរ។

ការចាប់ផ្តើមឡើងវិញនៃការចរចាបានបង្ហាញពីភាពធូរស្រាលនៃទំនាក់ទំនងរវាងប្រទេសទាំងពីរ ខណៈ លោក Carney ជំរុញឱ្យពង្រីកទំនាក់ទំនងពាណិជ្ជកម្មហួសពីសហរដ្ឋអាមេរិក ដែលជាដៃគូពាណិជ្ជកម្មធំបំផុតរបស់ខ្លួន។