សហរដ្ឋអាមេរិកបានយល់ព្រមផ្លាស់ប្តូរមួយចំនួនចំពោះសំណើសន្តិភាពដ៏ចម្រូងចម្រាសរបស់ខ្លួន ដើម្បីបញ្ចប់សង្គ្រាមនៅអ៊ុយក្រែន កាលពីថ្ងៃអាទិត្យ២៣វិច្ចិកា បន្ទាប់ពីការចរចាដ៏សំខាន់ដែលភាគីទាំងពីរត្រូវបានវាយតម្លៃថាជាជោគជ័យ។រដ្ឋមន្ត្រីការបរទេសអាមេរិក លោក Marco Rubioនិយាយថា កិច្ចពិភាក្សាជាមួយអ្នកការទូតអ៊ុយក្រែននៅទីក្រុងហ្សឺណែវ គឺជាដំណើរការប្រកបដោយផ្លែផ្កា និងមានអត្ថន័យបំផុត ហើយសហរដ្ឋអាមេរិកនឹងធ្វើវិសោធនកម្មផែនការរបស់ខ្លួន ដែលហាក់ដូចជាផ្អែកលើការចូលរួមរបស់អ៊ុយក្រែន។ 

កិច្ចពិភាក្សានៅទីក្រុងហ្សឺណែវកំពុងបន្ត ខណៈថ្ងៃផុតកំណត់បណ្ដោះអាសន្នរបស់លោក Donald Trump ដើម្បីយល់ព្រមលើកិច្ចព្រមព្រៀងមួយនៅថ្ងៃព្រហស្បតិ៍ សប្ដាហ៍នេះ ជិតមកដល់។

ប្រធានាធិបតីអាមេរិករូបនេះ បានបង្ហាញការខឹងសម្បាកាលពីថ្ងៃអាទិត្យ ដោយនិយាយថា សង្គ្រាមនឹងមិនកើតឡើងទេ បើស្ថិតនៅក្រោមភាពជាអ្នកដឹកនាំដ៏រឹងមាំ និងត្រឹមត្រូវរបស់សហរដ្ឋអាមេរិក និងអ៊ុយក្រែន។ លោកបានស្ដីបន្ទោសអ្នកកាន់តំណែងមុនបស់លោកគឺលោក      Joe Biden ថាជាអ្នកទទួលខុសត្រូវចំពោះសង្គ្រាមនេះ និងចេះតែឲ្យគ្រប់យ៉ាងដោយទទេៗទៅអ៊ុយក្រែន។

លោកបានចោទប្រកាន់ទីក្រុងគីវថាមិនបានបង្ហាញពីការដឹងគុណចំពោះកិច្ចខិតខំប្រឹងប្រែងរបស់អាមេរិកក្នុងការបញ្ចប់សង្គ្រាម ហើយបានស្ដីបន្ទោសអឺរ៉ុបចំពោះការទិញប្រេងពីរុស្ស៊ី។ 

លោក Andriy Yermak ប្រធានគណៈប្រតិភូអ៊ុយក្រែននៅប្រទេសស្វីស បានថ្លែងអំណរគុណលោក Trump ចំពោះការប្តេជ្ញាចិត្តរបស់លោកលើទីក្រុងគីវក្នុងអំឡុងថ្លែងសុន្ទរកថាខ្លីទៅកាន់ក្រុមអ្នកព័ត៌មាន មុនពេលលោក និងលោក Rubio បានវិលត្រឡប់ទៅកិច្ចពិភាក្សារបស់ពួកគេវិញ។ប៉ុន្មាននាទីក្រោយមក ប្រធានាធិបតីអ៊ុយក្រែន លោក Volodymyr Zelenskyy បានបញ្ជាក់ជាថ្មីនូវការដឹងគុណរបស់លោកចំពោះសហរដ្ឋអាមេរិក និងអឺរ៉ុបសម្រាប់ការគាំទ្ររបស់ពួកគេ៕