ភ្នំពេញ ៖ ឯកឧត្តម ស្រី សួន រដ្ឋលេខាធិការតំណាងដ៏ខ្ពង់ខ្ពស់លោកជំទាវ បណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ បានអៈអាងថា មន្រី្តក្របខណ្ឌវប្បធម៌២០២១ គឺជាទំពាំងស្នងឬស្សី និងជាមូលធនមនុស្សប្រកបដោយសក្តានុពល ក្នុងកិច្ចការងារលើកស្ទួយវិស័យ វប្បធម៌ និងវិចិត្រសិល្បៈនៅថ្ងៃអនាគត។

​ការថ្លែងរបស់ឯកឧត្តម ស្រី សួន យ៉ាងដូច្នេះ ក្នុងពិធីបិទវគ្គបណ្តុះបណ្តាលការងាររដ្ឋបាលសម្រាប់មន្រី្តរាជការក្របខណ្ឌឆ្នាំ២០២១ នាទីសី្តការក្រសួងរសៀលថ្ងៃទី១៧ ខែកុម្ភះ ឆ្នាំ២០២២។

ឯកឧត្តម រដ្ឋលេខាធិការ បានបន្តទៀតថា ការបំពាក់ចំណេះដឹង និងចំណេះធ្វើនៅកន្លែងធ្វើការ គឺជាផែនការយុទ្ធសាស្រ្តអាទិភាព ដែលប្រមុខរាជរដ្ឋាភិបាល ជាពិសេសក្រសួង តែងតែគិតគូអភិវឌ្ឍន៍សមត្ថភាព និងធនធានមនុស្សក្នុងវិស័យរដ្ឋបាល និងជំនាញវិជ្ជាជីវៈដែលបម្រើឲ្យវិស័យសិល្បៈ និងវប្បធម៌ និងដើម្បីឲ្យដើរស្របទៅតាមបរិបទនៃសាកលភាវូបនីយកម្ម និងភាពរីកចំរើនរបស់សង្គមជាតិនាពេលបច្ចុប្បន្ននេះ។ ទន្ទឹមនឹងនោះ រយៈពេល៣ថ្ងៃនៃវគ្គបណ្តុះបណ្តាលនេះ សិក្ខាកាមទាំងអស់ពិតជាបានខិតខំប្រឹងប្រែងទទួលយកនូវចំណេះដឹងថ្មីៗ ល្អៗ ពីលោកគ្រូឧទ្ទេសដែលមានចំណេះដឹង ជំនាញ និងបទពិសោធច្បាស់លាស់ លើមុខវិជ្ជាទាក់ទងនឹងកិច្ចការរដ្ឋបាល ដែលពិតជាផ្តល់ផលប្រយោជន៍ច្រើនដល់កិច្ចការងារប្រចាំថ្ងៃរបស់មន្រី្ត កម្មសិក្សាទាំងអស់ ដែលសំដៅពង្រឹងនូវគុណភាព ប្រសិទ្ធភាពការងារនៅតាមអង្គភាពនីមួយៗ។ ទន្ទឹមនឹងនេះឯកឧត្តម ស្រី សួន ក៏ស្នើសុំឲ្យសាលាបណ្តុះបណ្តាលក្របខណ្ឌវប្បធម៌ បន្តអភិវឌ្ឍ និងកែទម្រង់ធ្វើឲ្យប្រសើរឡើងថែមទៀតប្រព័ន្ធការងារ និងការបណ្តុះបណ្តាលនៅសាលា តួយ៉ាង ការគ្រប់គ្រងច្បាស់លាស់ ការធ្វើទំនើបកម្មជាបន្តបន្ទាប់ហេដ្ឋារចនាសម្ព័ន្ធសិក្សា និងស្រាវជ្រាវ ការធ្វើទំនើបកម្មប្រព័ន្ធគ្រប់គ្រង និងការងាររដ្ឋបាលសំដៅធានាបានតម្លាភាព គណនេយ្យ និងគុណភាពគំរូ។ សហការឲ្យបានល្អជាមួយនាយកដ្ឋានពាក់ព័ន្ធ និងរដ្ឋបាលថ្នាក់ក្រោមជាតិ ដាក់ចេញយន្តការវាយតម្លៃបេក្ខភាព និងជ្រើសរើសសម្រាំងយកបេក្ខជនល្អៗដែលធ្វើការផ្ទាល់ នឹងជំនាញដែលត្រូវមកបណ្តុះបណ្តាលឲ្យរៀនយល់ដឹងច្បាស់អំពីការទទួលខុសត្រូវរបស់ពួកគេនាពេលអនាគត។

បើតាមលោក តន សុវណ្ណឧត្តម នាយកសាលាបណ្តុះបណ្តាលក្របខណ្ឌវប្បធម៌ បានឲ្យដឹងថា បន្ទាប់ពីដំណើរការវគ្គបណ្តុះបណ្តាលអស់រយៈពេល៣ថ្ងៃ ចាប់ពីថ្ងៃទី១៥-១៧ ខែកុម្ភះ ឆ្នាំ២០២២ មានសិក្ខាកាមសរុបចំនួន៩៨រូប ក្នុងនោះស្រី្ត៤៨រូបមកពីនាយកដ្ឋាន និងមនី្ទរវប្បធម៌រាជធានី- ខេត្ត។ ក្រោយការបណ្តុះបណ្តាលយើងអាចគណនាសមត្ថភាពនៃការយល់ដឹងរបស់សិក្ខាកាមទាំងអស់មានការយល់ដឹងកើនឡើងគួរជាទីមោទនៈ និងទទួលបានការវាយតម្លៃសមត្ថភាពនៃការយល់ដឹងដូច ខាងក្រោម៖ កំរិតខ្សោយមានការថយចុះមកត្រឹមចំនួន២%, កំរិតមធ្យមមានការកើនឡើងមកត្រឹមចំនួន៩០% និងកំរិតល្អ មានចំនួនការកើនឡើងមកត្រឹម៨%។ ជាពិសេសតាមរយៈវគ្គបណ្តុះបណ្តាលនេះ លោកសង្ឃឹមថា ប្អូនៗដែលជាសិក្ខាកាមនិងជាមន្រី្តកម្មសិក្សារបស់ក្រសួង ពិតជាទទួលបាននូវចំណេះដឹង និងទស្សនាទានថ្មី សម្រាប់យកទៅបម្រើការងារលើវិស័យរដ្ឋបាលនៅក្នុងអង្គភាពរបស់ខ្លួនផងដែរ៕ អត្ថបទ ៖ រដ្ឋា