ទីភ្នាក់ងារគ្រោះមហន្តរាយជាតិម៉ាឡេស៊ី បាននិយាយនៅថ្ងៃចន្ទ (២៤ វិច្ឆិកា) នេះថា មនុស្សជាង ១១.០០០នាក់ ក្នុងរដ្ឋចំនួន៧ របស់ប្រទេស បានរងផលប៉ះពាល់ដោយសារទឹកជំនន់ដែលបណ្តាលមកពីភ្លៀងធ្លាក់យ៉ាងខ្លាំងក្លា។

ទឹកជំនន់ជារឿងធម្មតាទៅហើយនៅតំបន់ឆ្នេរភាគខាងកើតម៉ាឡេស៊ី ក្នុងរដូវខ្យល់មូសុងប្រចាំឆ្នាំ ចាប់ពីខែតុលា ដល់ខែមីនា ដោយមនុស្សរាប់ពាន់នាក់ត្រូវជម្លៀសរៀងរាល់ឆ្នាំ ដោយសារគ្រោះធម្មជាតិនេះ។

របាយការណ៍ពីទីភ្នាក់ងារគ្រប់គ្រងគ្រោះមហន្តរាយជាតិ បានបង្ហាញថា មនុស្សចំនួន ១១.០០៩នាក់មកពី ៣.៨៣៩គ្រួសារ បានរងផលប៉ះពាល់ដោយទឹកជំនន់នៅក្នុងរដ្ឋចំនួន ៧ដូចជា រដ្ឋKedah, រដ្ឋ Kelantan, រដ្ឋ Penang, រដ្ឋ Perak, រដ្ឋ Perlis, រដ្ឋ Terengganu និងរដ្ឋ Selangor គិតត្រឹមម៉ោងក្នុងស្រុក ៦ព្រឹក នាថ្ងៃចន្ទនេះ។

រដ្ឋ Kelantan ភាគឦសានជាប់ព្រំដែនថៃ រងគ្រោះធ្ងន់ធ្ងរបំផុត ដោយមានមនុស្ស ៨.២២៨នាក់ បានរងគ្រោះ ប៉ុន្តែពុំមានការស្លាប់ត្រូវរាយការណ៍ទេ។ ប្រព័ន្ធផ្សព្វផ្សាយរដ្ឋរបស់ម៉ាឡេស៊ី បាននិយាយថា ក្នុងឧបទ្ទវហេតុដាច់ដោយឡែកមួយកាលពីថ្ងៃអាទិត្យកន្លងទៅ មនុស្សប្រហែល ៤០០នាក់ ត្រូវជាប់គាំងដោយសារគ្រោះបំណាក់ដី ដែលបង្កឡើងដោយភ្លៀងធ្លាក់ជាបន្តបន្ទាប់ នៅក្នុងភូមិ Wang Kelian ដែលជាភូមិមួយនៅភាគពាយព្យនៃរដ្ឋ Perlis ។

ទីភ្នាក់ងារព័ត៌មានរដ្ឋ Bernama បានរាយការណ៍កាលពីល្ងាចថ្ងៃអាទិត្យ ដោយដកស្រង់សម្តីមន្ត្រីនគរបាលស្រុកថា ប្រជាជនដែលជាប់គាំងទាំងនោះ មានសុវត្ថិភាពហើយ និងកំពុងជ្រកកោននៅក្នុងវិហារអ៊ិស្លាមលើទីទួលខ្ពស់មួយកន្លែង៕