ប្រព័ន្ធផ្សព្វផ្សាយក្នុងស្រុក បានដកស្រង់សម្តីរបស់ក្រសួងការពារជាតិអង់គ្លេសដែលបាននិយាយកាលពីថ្ងៃអាទិត្យថា កងទ័ពជើងទឹកអង់គ្លេស បានស្ទាក់ចាប់នាវាចម្បាំងរុស្ស៊ីមួយគ្រឿង និងនាវាដឹកប្រេងមួយគ្រឿង នៅឆ្នេរសមុទ្រអង់គ្លេស ក្នុងប្រតិបត្តិការតាមដានក្នុងរយៈពេលពីរសប្តាហ៍កន្លងមកនេះ។ 

ក្រសួងបានឲ្យដឹងថា នាវាល្បាត HMS Severn ដែលជានាវាល្បាតរបស់កងទ័ពជើងទឹកអង់គ្លេស បានតាមដាននាវាចម្បាំង RFN Stoikiy និងនាវាដឹកប្រេងមួយគ្រឿង ដែលបានធ្វើដំណើរឆ្លងកាត់ច្រកសមុទ្រ Dover និងឆ្ពោះទៅទិសខាងលិចឆ្លងកាត់ច្រកសមុទ្រអង់គ្លេស ដោយមិនបានបញ្ជាក់ពីពេលវេលានៃការស្ទាក់ចាប់នោះទេ។

ក្រសួងបានអះអាងថា ក្រោយមក នាវាល្បាត HMS Severn នេះ បានប្រគល់ភារកិច្ចត្រួតពិនិត្យទៅ      ឲ្យ«សម្ព័ន្ធមិត្តមួយរបស់អង្គការណាតូ» ប៉ុន្តែនៅតែបន្តសង្កេតមើលពីចម្ងាយ។

ការស្ទាក់ចាប់នេះ បានកើតឡើង បន្ទាប់ពីរដ្ឋមន្ត្រីការពារជាតិអង់គ្លេស លោក John Healey បាននិយាយកាលពីថ្ងៃពុធថា នាវារុស្ស៊ីមួយគ្រឿងឈ្មោះ Yantar ដែលកំពុងធ្វើដំណើរនៅលើដែនទឹកអង់គ្លេស បានបាញ់កាំរស្មីឡាស៊ែរទៅកាន់អ្នកបើកយន្តហោះកងទ័ពអាកាសអង់គ្លេស ដែលកំពុងតាមដានការធ្វើដំណើរ របសនាវានេះ។

ខណៈពេលដែលចក្រភពអង់គ្លេស បានចាត់ទុកនាវា Yantar ថា ជា «នាវាចារកម្មរុស្ស៊ី» ស្ថានទូតរុស្ស៊ីប្រចាំនៅចក្រភពអង់គ្លេស បានបញ្ជាក់ថា វាគ្រាន់តែជា «នាវាស្រាវជ្រាវមហាសមុទ្រ» ដែលកំពុងប្រតិបត្តិការនៅក្នុងដែនទឹកអន្តរជាតិ ដោយបន្ថែមថា សកម្មភាពរបស់រុស្ស៊ី មិនបានប៉ះពាល់ដល់ផលប្រយោជន៍របស់ចក្រភពអង់គ្លេស ហើយក៏មិនមានបំណងធ្វើឲ្យប៉ះពាល់ដល់សន្តិសុខរបស់ប្រទេសនេះដែរ៕