តម្លៃប្រេងមានលំនឹងបន្តិចនៅថ្ងៃចន្ទ (២៤ វិច្ឆិកា) នេះ បន្ទាប់ពីការធ្លាក់ចុះកាលពីសប្តាហ៍មុនប្រហែល ៣% ខណៈវិនិយោគិនសកលកំពុងតែថ្លឹងថ្លែងឱ្យបានហ្មត់ចត់អំពីលទ្ធភាពកាត់បន្ថយអត្រាការប្រាក់របស់ធនាគារកណ្ដាលសហរដ្ឋអាមេរិក ទល់នឹងការរំពឹងទុកនៃកិច្ចព្រមព្រៀងរុស្ស៊ី-អ៊ុយក្រែន ដែលអាចនាំឱ្យមានការផ្គត់ផ្គង់ពីរុស្ស៊ីបន្ថែមទៀត តាមរយៈការបន្ធូរបន្ថយទណ្ឌកម្ម។

សន្ទស្សន៍ប្រេងឆៅរបស់ Brent មិនផ្លាស់ប្តូរទេនៅក្នុងតម្លៃ ៦២,៥៦ដុល្លារក្នុងមួយបារ៉ែល គិតត្រឹមម៉ោងសកល ០៤:៥៨នាទី ព្រឹមព្រលឹមថ្ងៃចន្ទនេះ ខណៈសន្ទស្សន៍របស់ប្រេងអាមេរិក WTI ធ្លាក់ចុះបន្តិចចំនួន ២សេន ឬ ០,០៣% នៅតម្លៃ ៥៨,០៤ដុល្លារក្នុងមួយបារ៉ែល។

អ្នកវិភាគទីផ្សារ IG លោក Tony Sycamore បានសរសេរនៅក្នុងកំណត់ត្រាមួយថា "ស្ថានភាពនេះត្រូវបង្កឡើងជាចម្បងដោយការជំរុញយ៉ាងខ្លាំងក្លារបស់លោកប្រធានាធិបតី Donald Trump សម្រាប់កិច្ចព្រមព្រៀងសន្តិភាពរុស្ស៊ី-អ៊ុយក្រែន ដែលទីផ្សារសកលមើលឃើញថា ជាផ្លូវដ៏លឿនក្នុងការបើកឱ្យមានការផ្គត់ផ្គង់ពីរុស្ស៊ី យ៉ាងច្រើនសន្ធឹកសន្ធាប់ឡើងវិញ"។

គួរឱ្យដឹងថា កិច្ចព្រមព្រៀងសន្តិភាពមួយ អាចនាំឱ្យមានការដកទណ្ឌកម្មដែលបានរារាំងការនាំចេញប្រេងរបស់រុស្ស៊ី។ យោងតាមរដ្ឋបាលព័ត៌មានថាមពលរបស់អាមេរិក បានឱ្យដឹងថា រុស្ស៊ីគឺជាប្រទេសផលិតប្រេងឆៅធំជាងគេទីពីរនៅលើពិភពលោក បន្ទាប់ពីសហរដ្ឋអាមេរិក នៅក្នុងឆ្នាំ២០២៤៕