លោកប្រធានាធិបតី Ferdinand Marcos Jr. បាននិយាយនៅថ្ងៃចន្ទនេះថា អាជ្ញាធរហ្វីលីពីន បានឃាត់ខ្លួនជនសង្ស័យ ៧នាក់ និងជាច្រើននាក់ទៀត កំពុងត្រូវបានតាមស្វែងរក នៅក្នុងរឿងអាស្រូវពុករលួយដ៏ធំមួយដែលពាក់ព័ន្ធនឹងគម្រោងគ្រប់គ្រងទឹកជំនន់ ខណៈពេលដែលលោកបានព្យាយាមទប់ស្កាត់កំហឹងរបស់សាធារណជនជុំវិញភាពមិនប្រក្រតីដ៏គួរឲ្យស្អប់ខ្ពើម ដែលបានធ្វើឲ្យសមាជិកសភាដ៏មានអំណាច មានការព្រួយបារម្ភ។

អំពើពុករលួយទ្រង់ទ្រាយធំ ត្រូវបានស្តីបន្ទោសចំពោះគម្រោងគ្រប់គ្រងទឹកជំនន់ ដែលមិនមានស្តង់ដា ឬមិនមាននៅក្នុងប្រទេសអាស៊ីអាគ្នេយ៍ដែលក្រីក្រ និងងាយរងគ្រោះដោយទឹកជំនន់ដ៏ធ្ងន់ធ្ងរ និងអាកាសធាតុដ៏អាក្រក់។ ប្រធានាធិបតីហ្វីលីពីនពីររូប រួមទាំងឪពុករបស់លោក Marcos ត្រូវបានផ្តួលរំលំក្នុងការបះបោរសាធារណៈដោយសន្តិវិធី ដោយសារតែការចោទប្រកាន់ជុំវិញអំពើចោរកម្ម និងការគ្រប់គ្រងមិន     ត្រឹមត្រូវ។

ក្រុមដំបូងនៃជនសង្ស័យជាង ១០នាក់ រួមទាំងលោក Zaldy Co អតីតសមាជិកសភាតំណាងរាស្ត្រ និងវិស្វករសំណង់សាធារណៈរបស់រដ្ឋាភិបាល ត្រូវបានចោទប្រកាន់ដោយតុលាការ Sandiganbayan ដែលជាតុលាការប្រឆាំងអំពើពុករលួយពិសេសមួយ ក្នុងចំណោមអ្វីដែលត្រូវបានគេរំពឹងថា នឹងមានបណ្តឹងព្រហ្មទណ្ឌ និងអំពើពុករលួយរាប់សិបករណីដែលលោក Marcos បានសន្យាថា នឹងចាប់ខ្លួនសមាជិកព្រឹទ្ធសភាដែលពាក់ព័ន្ធ សមាជិកសភា និងម្ចាស់ក្រុមហ៊ុនសំណង់ ដែលមានទ្រព្យសម្បត្តិ នៅមុនថ្ងៃបុណ្យណូអែល។

ករណីពុករលួយដំបូងពាក់ព័ន្ធនឹងភាពមិនប្រក្រតីនៃគម្រោងគ្រប់គ្រងទឹកជំនន់ នៅក្នុងខេត្ត Oriental Mindoro រួមទាំងទំនប់ទឹកទន្លេដែលមានតម្លៃ ២៨៩ លានប៉េសូ (៤,៨លានដុល្លារ) ដែលត្រូវបានអនុវត្តដោយក្រុមហ៊ុន Sunwest Corp. ជាក្រុមហ៊ុនសំណង់ដែលមន្ត្រីនិយាយថា ជាកម្មសិទ្ធិរបស់ក្រុមគ្រួសាររបស់លោក Co៕