បាល់ទាត់៖ ក្រុមបាល់ទាត់ជម្រើសជាតិអាយុក្រោម ២៣ឆ្នាំកម្ពុជាបានបង្កើនឱកាសឡើងវគ្គពាក់កណ្ដាលផ្ដាច់ព្រ័ត្រនៃពានរង្វាន់ AFF U23 Championship 2022 កាន់តែខ្ពស់ក្រោយបន្ដជ័យជម្នះ ១-០ លើក្រុម U23 ហ្វីលីពីនក្នុងប្រកួតទី២ នៃពូល A នៅវិមានកីឡដ្ឋាននៃពហុកីឡដ្ឋានជាតិមរតកតេជោកាលពីយប់ថ្ងៃទី១៧ ខែកុម្ភៈ អមជាមួយការរក្សាសំណាញ់ទីមិនឲ្យរបូតគ្រាប់បាល់ (Clean Sheet) ២ប្រកួតជាប់គ្នាទៀតផង។
ការប្រកួតនេះបានបញ្ចប់ដោយភាពតានតឹងបំផុត បន្ទាប់ពីក្រុមទាំងពីរបានព្យាយាមដាក់សម្ពាធគ្នាទៅវិញទៅមកពេញ ៩០នាទី ហើយ ១គ្រាប់ដែលជួយឲ្យក្រុមគោព្រៃជំទង់កម្ពុជាបន្ដកំណត់ត្រាឈ្នះលើទឹកដីថ្មី នៃពហុកីឡដ្ឋានជាតិមរតកតេជោក្នុងព្រឹត្តិការណ៍ប្រចាំតំបន់នៅកម្ពុជានេះ គឺធ្វើសម្រេចដោយកីឡាករវ័យក្មេងជាងគេ ស៊ិន សុវណ្ណមករា នៅនាទី៨២ បន្ទាប់ពីក្រុមទាំងពីរបានរក្សាលទ្ធផល ០-០ នៅវគ្គទី១។ ជ័យជម្នះដ៏មានសារៈសំខាន់នេះបានធ្វើឲ្យក្រុមជម្រើសជាតិ U23 កម្ពុជាបន្ដឈរកំពូលតារាងពូល A ដោយមាន ៦ពិន្ទុពេញ បន្ទាប់ពីប្រកួតបើកឆាកបានយកឈ្នះក្រុម U23 ប្រ៊ុយណេ ៦-០។ រីឯហ្វីលីពីនបានត្រឹមរក្សា ១ពិន្ទុក្នុងដៃក្រោយឆ្លងកាត់ ២ប្រកួតស្មើ ១ និងចាញ់ ១ តែពួកគេមិនទាន់អស់ឱកាសនោះទេ ដោយត្រូវចាំអ៊ុតការប្រកួតបញ្ចប់ពូលជាមួយប្រ៊ុយណេ ក៏ដូចជាលទ្ធផលប្រកួតរវាងកម្ពុជា និងទីម័រខាងកើតផងដែរ។
ក្រឡេកទៅមើលការប្រកួត ១គូទៀតក្នុងពូល A កាលពីម្សិលមិញគឺក្រុម U23 ទីម័រខាងកើតបានស្គាល់ជ័យជម្នះលើកដំបូង ក្រោយយកឈ្នះក្រុម U23 ប្រ៊ុយណេ ៣-១។ ជ័យជម្នះនេះបានធ្វើឲ្យទីម័រខាងកើតមាន ៤ពិន្ទុឈរលេខរៀងទី២ មុនឈានទៅជួបក្រុមគោព្រៃជំទង់កម្ពុជាដើម្បីប្រជែងកៅអីកំពូលតារាងនាថ្ងៃទី២០ ខែកុម្ភៈខាងមុខ។ រីឯការបរាជ័យ ២ប្រកួតជាប់គ្នារបស់ប្រ៊ុយណេបានធ្វើឲ្យពួកគេអស់ឱកាសប្រជែងកៅអីវគ្គបន្ដហើយ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
