ប្រធានាធិបតីប្រទេសលីបង់ លោក ចូសេហ្វ អោន(Joseph Aoun) បានថ្លែងសុន្ទរកថាទៅកាន់ប្រជាជាតិ ដោយប្រកាសពីគំនិតផ្តួចផ្តើមប្រាំចំណុចដើម្បីស្តារសន្តិភាព និងបញ្ចប់ភាពតានតឹងឆ្លងព្រំដែនជាមួយអ៊ីស្រាអែល។ គំនិតផ្តួចផ្តើមនេះផ្តោតលើការពង្រឹងកងទ័ពតាមរយៈការគាំទ្រជាសកល ការកសាងឡើងវិញតំបន់ដែលរងផលប៉ះពាល់ និងការដាក់ពង្រាយកងកម្លាំងនៅភាគខាងត្បូងនៃទន្លេ Litani ជាទន្លេធំបំផុតរបស់ប្រទេសលីបង់។

លោកប្រធានាធិបតីបាននិយាយថា លីបង់បានត្រៀមខ្លួនដើម្បីចរចា ក្រោមការគាំទ្រពីអង្គការសហប្រជាជាតិ សហរដ្ឋអាមេរិក ឬស្ថាប័នអន្តរជាតិរួមគ្នា ខណៈកិច្ចព្រមព្រៀងណាមួយនឹងបង្កើតរូបមន្តសម្រាប់ការបញ្ឈប់ការវាយប្រហារឆ្លងព្រំដែនជាអចិន្ត្រៃយ៍។

លោក Jassam Jouni សាស្ត្រាចារ្យផ្នែកច្បាប់អន្តរជាតិនៃសាកលវិទ្យាល័យលីបង់ បាននិយាយថា សុន្ទរកថារបស់លោកប្រធានាធិបតីបង្ហាញពីទំនុកចិត្ត និងការត្រៀមខ្លួនរបស់ប្រទេសលីបង់ក្នុងការទទួលបាននូវសន្តិភាព និងស្ថិរភាព។

លោក Jouni និយាយថា «លោកប្រធានាធិបតី បានទទូចលើការថ្លែងសុន្ទរកថារបស់លោកពីលីបង់ខាងត្បូង ដោយផ្ញើសារដ៏សំខាន់មួយ មិនត្រឹមតែទៅកាន់ប្រជាជនលីបង់ប៉ុណ្ណោះទេ ប៉ុន្តែថែមទាំងទៅកាន់សត្រូវអ៊ីស្រាអែលថា តំបន់នេះត្រូវតែរំដោះ និងរស់នៅក្នុងសន្តិភាព។