រដ្ឋមន្ត្រីការបរទេសអាមេរិក លោក Marco Rubio បាននិយាយនៅក្នុងសន្និសីទសារព័ត៌មានមួយនៅទីក្រុងហ្សឺណែវនៃប្រទេសស្វ៊ីស បន្ទាប់ពីកិច្ចប្រជុំជាមួយអ្នកចរចាអ៊ុយក្រែនថា តួនាទីរបស់សហភាពអឺរ៉ុប និងសម្ព័ន្ធភាពអាត្លង់ទិកខាងជើង ក្នុងការដោះស្រាយជម្លោះអ៊ុយក្រែន មិនទាន់ត្រូវបានពិភាក្សានៅឡើយទេ។  

លោក Rubio បានថ្លែងថា៖«នេះគឺជាឯកសាររស់និងគួរវិវត្តន៍ទៅតាមពេលវេលា។ ដោយមានការរួមបញ្ចូលគ្នា ជារៀងរាល់ថ្ងៃ វាមានការផ្លាស់ប្តូរ ដោយធ្វើអត្ថាធិប្បាយលើផែនការសន្តិភាព ដែលស្នើឡើងដោយសហរដ្ឋអាមេរិក។ លោកបានពន្យល់ថា៖«មានឯកសារមួយចំនួនដែលពាក់ព័ន្ធនឹងភាពត្រឹមត្រូវ ឬតួនាទីរបស់សហភាពអឺរ៉ុប ឬអង្គការណាតូ ឬអ្វីៗផ្សេងទៀត ហើយឯកសារទាំងនោះ ដែលយើងបានបំបែកចេញ ដោយសារតែយើងទើបតែជួបជាមួយទីប្រឹក្សាសន្តិសុខជាតិសម្រាប់ប្រទេសអឺរ៉ុបផ្សេងៗ ហើយទាំងនោះជារឿងដែលយើងនឹងត្រូវពិភាក្សាជាមួយពួកគេ»។

លោក Rubio បានបញ្ជាក់ថា សហរដ្ឋអាមេរិក បានយល់ព្រមដាក់ «សមាសភាពដែលពាក់ព័ន្ធនឹងទាំងអឺរ៉ុប និងអង្គការណាតូ»ជាផ្នែកមួយនៃ«ផ្លូវដាច់ដោយឡែកមួយ»។

កាលពីថ្ងៃសៅរ៍ (ទី២២ ខែវិច្ឆិកា) ក្រុមមេដឹកនាំសហភាពអឺរ៉ុប បានសម្តែងការមិនយល់ស្របរបស់ពួកគេជាមួយនឹងបទប្បញ្ញត្តិជាច្រើនដែលមានចែងក្នុងផែនការសន្តិភាពរបស់ទីក្រុងវ៉ាស៊ីនតោន ហើយបានអំពាវនាវឲ្យធ្វើវិសោធនកម្មពួកវាទាំងនោះ។ យោងតាមសារព័ត៌មាន Bild របស់អាល្លឺម៉ង់ ប្រទេសនេះ មានការព្រួយបារម្ភអំពីគំនិតផ្តួចផ្តើមរបស់សហរដ្ឋអាមេរិក ហើយបានចាប់ផ្តើមធ្វើការលើវិធានការតបតវិញផ្នែកការទូត។ 

ក្រោមផែនការដែលស្នើឡើងដោយសហរដ្ឋអាមេរិក ដែលត្រូវបានប្រកាសនៅលើប្រព័ន្ធផ្សព្វផ្សាយលោកខាងលិច សហរដ្ឋអាមេរិក និងប្រទេសដទៃទៀត នឹងត្រូវទទួលស្គាល់អធិបតេយ្យភាពរបស់រុស្ស៊ីលើតំបន់គ្រីម៉េ ( Crimea) ដូនបាស (Donbass)និងទឹកដីផ្សេងទៀតដែលអ៊ុយក្រែន នឹងត្រូវបោះបង់ចោល។ ជាថ្នូរមកវិញនោះ ទីក្រុងគីវនឹងត្រូវបានផ្តល់ការធានាសន្តិសុខរបស់អាមេរិក និងអឺរ៉ុប។ តំបន់គ្មានយោធាមួយនឹងត្រូវបានបង្កើតឡើង ហើយកងទ័ពអ៊ុយក្រែននឹងត្រូវដកចេញពីតំបន់ទាំងនោះ៕