ស៊ីហ្គេម៖ គណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) បានដាក់ចេញនូវយុទ្ធនាការមួយក្នុងផែនការយុទ្ធសាស្ដ្ររបស់ខ្លួន ដើម្បីគាំទ្រសកម្មភាពរបស់រាជធានី-ខេត្តក្នុងការចូលរួមផ្សព្វផ្សាយព្រឹត្តិការណ៍ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ នៅកម្ពុជា។ នេះបើតាមការបញ្ជាក់របស់ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC កាលពីថ្មីៗ។
ឯកឧត្តម វ៉ាត់ ចំរើន បានគូសបញ្ជាក់ថា យុទ្ធនាការនៃផែនការយុទ្ធសាស្ដ្រនេះ ត្រូវបានចុះហត្ថលេខាដោយសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធានគណៈកម្មាធិការជាតិ CAMSOC រួចហើយ ដើម្បីគាំទ្រសកម្មភាពរាជធានី-ខេត្ដឲ្យស្របទៅនឹងការបំផ្ទុះការផ្សព្វផ្សាយស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ ថា កម្ពុជាបានត្រៀមខ្លួនរួចរាល់សម្រាប់ព្រឹត្តិការណ៍ជាប្រវត្តិសាស្ដ្រនេះ។ សម្ដេចពិជ័យសេនា ទៀ បាញ់ បានមានប្រសាសន៍ក្នុងសន្និបាតបូកសរុបការងារឆ្នាំ២០២១ និងលើកទិសទៅឆ្នាំ២០២២-២០២៣ និងសិក្ខាសាលាថ្នាក់ជាតិស្ដីពីអភិបាលកិច្ចល្អកាលពីថ្មីៗថា បេសកកម្មធ្វើម្ចាស់ផ្ទះព្រឹត្តិការណ៍ប្រចាំតំបន់នេះមិនមែនតែរាជធានី-ខេត្ត ៥ ដែលត្រូវរៀបចំការប្រកួតតាមប្រភេទកីឡានីមួយៗនោះទេ តែជាកាតព្វកិច្ចរបស់រាជធានី-ខេត្តទាំងអស់ ដែលត្រូវចូលរួមផ្សព្វផ្សាយដល់ប្រជាពលរដ្ឋរបស់ខ្លួនឲ្យចូលរួមទាំងអស់គ្នា ព្រោះប្រជាជនម្នាក់ៗសុទ្ធតែមានតួនាទីជាម្ចាស់ផ្ទះដូចគ្នា។
គួរដឹងថា មកទល់ពេលនេះកម្ពុជានៅសល់ពេលតែ ៤៤១ថ្ងៃទៀតប៉ុណ្ណោះក្នុងដំណើរឆ្ពោះទៅធ្វើជាម្ចាស់ព្រឹត្តិការណ៍ជាប្រវត្តិសាស្ដ្រ ដែលរាជរដ្ឋាភិបាលបានកំណត់ការប្រកួតកីឡាស៊ីហ្គេមលើកទី៣២ ចាប់ពីថ្ងៃទី០៥ ខែឧសភាដល់ថ្ងៃទី៧ ខែឧសភា ឆ្នាំ២០២៣ និងការប្រកួតកីឡាអាស៊ានប៉ារ៉ាហ្គេមលើកទី១២ ចាប់ពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣។ ចំពោះទីតាំងធំៗដែលត្រូវបាន CAMSOC កំណត់ត្រៀមរៀបចំការប្រកួតកីឡាស៊ីហ្គេមរួមមានរាជធានីភ្នំពេញ ខេត្តសៀមរាប ខេត្តព្រះសីហនុ ខេត្តកំពត ខេត្តកែប និងខេត្តកំពង់ស្ពឺ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
