រដ្ឋមន្ត្រីក្រសួងការពារជាតិជប៉ុនដែលកំពុងធ្វើទស្សនកិច្ចនៅមូលដ្ឋានយោធា ក្បែរកោះតៃវ៉ាន់ បាននិយាយថា ផែនការដាក់ពង្រាយមីស៊ីលទៅកាន់ទីតាំងនេះ កំពុងដំណើរការ ខណៈភាពតានតឹងឡើងកម្ដៅកាន់តែក្តៅគគុក រវាងទីក្រុងតូក្យូ និងទីក្រុងប៉េកាំង ជុំវិញកោះអាស៊ីបូព៌ា។

កាលពីថ្ងៃអាទិត្យ (ទី២៣ ខែវិច្ឆិកា) លោក Shinjiro Koizumi បានប្រាប់អ្នកសារព័ត៌មានថា៖ «ការដាក់ពង្រាយនេះ អាចជួយកាត់បន្ថយឱកាសនៃការវាយប្រហារដោយប្រដាប់អាវុធលើប្រទេសរបស់យើង។ ទស្សនៈ ដែលថា វានឹងបង្កើនភាពតានតឹងក្នុងតំបន់នោះ គឺមិនត្រឹមត្រូវឡើយ»។

ជប៉ុនគ្រោងនឹងដាក់ពង្រាយមីស៊ីលបាញ់ពីដីទៅអាកាសរយៈចម្ងាយមធ្យម នៅលើកោះ Yonaguni ដែលមានចម្ងាយប្រហែល ១១០គីឡូម៉ែត្រ នៅភាគខាងកើតនៃកោះតៃវ៉ាន់ ដោយនេះជាផ្នែកនៃការពង្រឹងវត្តមានយោធាយ៉ាងទូលំទូលាយ នៅលើកោះភាគខាងត្បូងរបស់ខ្លួន។ ចំណាត់ការនេះឆ្លុះបញ្ចាំងពីក្ដីបារម្ភរបស់ទីក្រុងតូក្យូ អំពីការកើនឡើងនូវឥទ្ធិពលយោធារបស់ប្រទេសចិន និងលទ្ធភាពនៃការមានការប៉ះទង្គិច ជុំវិញបញ្ហាកោះតៃវ៉ាន់។

ការភ័យខ្លាចទាំងនោះ ត្រូវបានពង្រីក ដោយសារជម្លោះ ជុំវិញការអត្ថាធិប្បាយថ្មីៗរបស់នាយករដ្ឋមន្ត្រី លោកស្រី Sanae Takaichi ទាក់ទងនឹងដែនដីស្វ័យគ្រប់គ្រង ដែលទីក្រុងប៉េកាំងចាត់ទុកថា ជាខេត្តដែលត្រូវតែនាំមកឲ្យស្ថិតនៅក្រោមការគ្រប់គ្រងរបស់ខ្លួនដោយកម្លាំង ប្រសិនបើចាំបាច់។ 

លោកស្រី Takaichi កាលពីថ្ងៃទី៧ ខែវិច្ឆិកា បានលើកឡើងពីលទ្ធភាពជាទ្រឹស្តី ដែលថា ជប៉ុនអាចដាក់ពង្រាយយោធារបស់ខ្លួនជាមួយប្រទេសផ្សេងទៀត ប្រសិនបើចិនវាយប្រហារកោះតៃវ៉ាន់ ជាអ្វីដែលនាំឲ្យមានការឆ្លើយតបយ៉ាងខឹងសម្បា និងការសងសឹកខាងសេដ្ឋកិច្ចពីទីក្រុងប៉េកាំង៕