នៅថ្ងៃចន្ទ (ទី២៤ ខែវិច្ឆិកា) នេះ ការិយាល័យរបស់លោក Lee Jae Myung បានឲ្យដឹងនៅក្នុងសេចក្តីថ្លែងការណ៍មួយថា ប្រធានាធិបតីកូរ៉េខាងត្បូងរូបនេះ បានជួបជាមួយនាយករដ្ឋមន្ត្រីចិន លោក Li Qiang និងនាយករដ្ឋមន្ត្រីជប៉ុន លោកស្រី Sanae Takaichi អំឡុងកិច្ចប្រជុំកំពូលរបស់ក្រុមប្រទេសមានឧស្សាហកម្មលូតលាស់ឈានមុខគេទាំង២០ (G20) កាលពីចុងសប្តាហ៍កន្លងទៅ នៅប្រទេសអាហ្វ្រិកខាងត្បូង។

បើយោងតាមសេចក្តីថ្លែងការណ៍នោះ បានឲ្យដឹងថា ប្រធានាធិបតីកូរ៉េខាងត្បូង បានប្រាប់លោក Li ថា លោកសង្ឃឹមថា នឹងមានជំនួបកំពូលជាមួយប្រធានាធិបតីចិន លោក Xi Jinping នៅទីក្រុងប៉េកាំងនាពេលខាងមុខ ហើយលោក Li បាននិយាយតបវិញថា លោកនឹងនាំយកសារទៅជម្រាបលោក Xi។

សេចក្តីថ្លែងការណ៍បានឲ្យដឹងទៀតថា លោក Lee បានសង្កត់ធ្ងន់ថា ការប្រាស្រ័យទាក់ទងគ្នា មានសារៈសំខាន់ណាស់ ក្នុងការសាងនូវទំនុកចិត្តទៅវិញទៅមក រវាងប្រទេសទាំង២ ហើយថា លោក Li បានយល់ស្របជាមួយការលើកឡើងនោះ។

ជាមួយគ្នានេះ ការិយាល័យរបស់លោក Lee បានបន្ថែមថា សម្រាប់កិច្ចប្រជុំជាមួយលោកស្រី Takaichi របស់ប្រទេសជប៉ុន មេដឹកនាំទាំង២ បានអះអាងសារជាថ្មី អំពីសារៈសំខាន់នៃទំនាក់ទំនងទ្វេភាគី ស្របពេលសណ្តាប់ធ្នាប់អន្តរជាតិកំពុងស្ថិតក្នុងភាពមិនច្បាស់លាស់។

ដោយឡែកក្នុងអំឡុងពេលផ្ដល់សុន្ទរកថា កាលពីថ្ងៃអាទិត្យ លោក Lee បានសន្យាថា នឹងធ្វើឲ្យកិច្ចប្រជុំ G20 នៅតែជាវេទិកាដ៏មានឥទ្ធិពលបំផុត សម្រាប់កិច្ចសហប្រតិបត្តិការអន្តរជាតិ នៅពេលដែលកូរ៉េខាងត្បូងធ្វើជាម្ចាស់ផ្ទះក្នុងឆ្នាំ២០២៨៕