អធិការបតីអាល្លឺម៉ង់ លោក Friedrich Merz កាលពីថ្ងៃអាទិត្យ (ទី២៣ ខែវិច្ឆិកា) បានរិះគន់ប្រធានាធិបតីអាមេរិក លោក Donald Trump ដែលធ្វើពហិការមិនចូលរួមកិច្ចប្រជុំកំពូលនៃក្រុមប្រទេសមានឧស្សាហកម្មលូតលាស់ទាំង២០ (G20) កាលពីចុងសប្តាហ៍ នៅប្រទេសអាហ្វ្រិកខាងត្បូង។

នៅខាងក្រៅកិច្ចប្រជុំ G20 ក្នុងទីក្រុង Johannesburg លោក Merz បានប្រាប់អ្នកសារព័ត៌មានថា៖ «ខ្ញុំមិនគិតថា វាជាការសម្រេចចិត្តដ៏ល្អមួយដោយរដ្ឋាភិបាលអាមេរិកដែលមិនធ្វើដំណើរមកកាន់ទីនេះឡើយ។ ប៉ុន្តែនោះជាអ្វីដែលរដ្ឋាភិបាលអាមេរិក ត្រូវសម្រេចដោយផ្ទាល់ខ្លួន»។

លោកបានបន្ថែមថា លោកចាប់អារម្មណ៍ចំពោះរបៀប ដែល «អ្នកអាចមើលឃើញថា ពិភពលោកបច្ចុប្បន្ន កំពុងស្ថិតក្រោមការរៀបចំឡើងវិញ ហើយការប្រា្រស្រ័យទាក់ទងថ្មី កំពុងត្រូវបានបង្កើតឡើងនៅទីនេះ»។

លោក Merz បានបញ្ជាក់ថា សហរដ្ឋអាមេរិក បានដើរតួនាទីតិចតួច រហូតដល់មានសុន្ទរកថាបិទកិច្ចប្រជុំកំពូលនេះដោយប្រធានាធិបតីអាហ្វ្រិកខាងត្បូង លោក Cyril Ramaphosa ដែលបានប្រគល់តំណែងប្រធាន G20 ឲ្យសហរដ្ឋអាមេរិកធ្វើជាម្ចាស់ផ្ទះបន្ទាប់ នៅឆ្នាំ២០២៦។

មេដឹកនាំអាល្លឺម៉ង់បាននិយាយថា៖ «ដូច្នេះ មានរឿងជាច្រើនបានកើតឡើងនៅទីនេះ ហើយអាមេរិកត្រូវបានគេលើកឡើងដោយត្រួសៗខ្លីៗប៉ុណ្ណោះ»។

គួរបញ្ជាក់ថា លោក Trump បានអវត្តមានពីកិច្ចប្រជុំកំពូល G20 នៅទីក្រុង Johannesburg ដោយសារតែលោកបានចោទប្រកាន់អាហ្វ្រិកខាងត្បូង ដោយមិនបានបង្ហាញភស្តុតាងណាមួយ អំពីការធ្វើទុក្ខបុកម្នេញ និងសម្លាប់កសិករស្បែកស នៅទីនោះ៕