ប្រធានាធិបតីកូរ៉េខាងត្បូង លោក Lee Jae Myung នៅថ្ងៃចន្ទ (ទី២៤ ខែវិច្ឆិកា) នេះ បានលើកឡើងថា កូរ៉េខាងជើង និងកូរ៉េខាងត្បូង កំពុងស្ថិតក្នុង «ស្ថានភាពដ៏គ្រោះថ្នាក់ខ្លាំងណាស់» ដែលការប៉ះទង្គិចគ្នាដោយចៃដន្យ អាចកើតឡើងបានគ្រប់ពេលវេលា ហើយវាមានសារៈសំខាន់ ដែលទីក្រុងសេអ៊ូលត្រូវចូលរួមជាមួយទីក្រុងព្យុងយ៉ាង នៅក្នុងការសន្ទនា។

លោក Lee ត្រូវបានដកស្រង់សម្តី ដែលបាននិយាយថា កូរ៉េខាងជើងកំពុងបដិសេធមិនព្រមឆ្លើយតប ចំពោះការហៅទូរសព្ទរបស់ទីក្រុងសេអ៊ូល ដើម្បីបង្កើតទំនាក់ទំនង ហើយកំពុងដំឡើងរបងលួសបន្លា តាមបណ្តោយព្រំដែនយោធា ជាអ្វីដែលមិនធា្លប់ត្រូវបានធ្វើឡើយ ចាប់តាំងពីចុងបញ្ចប់សង្រ្គាមកូរ៉េឆ្នាំ១៩៥០-៥៣។

បើតាមយោងតាមសារព័ត៌មាន Yonhap បានឲ្យដឹងថា លោក Lee បាននិយាយថា៖ «ទំនាក់ទំនងអន្តរកូរ៉េ បានក្លាយទៅជាអរិភាព និងការប្រឈមមុខដាក់គ្នាយ៉ាងខ្លាំង ហើយដោយមិនមានសូម្បីតែកម្រិតមូលដ្ឋាននៃការជឿទុកចិត្តគ្នា កូរ៉េខាងជើងកំពុងបង្ហាញឥរិយាបថកាន់តែតានតឹងខ្លាំង»។

លោក Lee បាននិយាយទៅកាន់អ្នកសារព័ត៌មាននៅលើជើងហោះហើរចេញពីប្រទេសអាហ្វ្រិកខាងត្បូង ជាកន្លែងដែលលោកបានចូលរួមកិច្ចប្រជុំកំពូលនៃក្រុមប្រទេសទាំង២០ (G20) ឆ្ពោះទៅកាន់ទួរគី ដែលជាជើងចុងក្រោយនៃការធ្វើដំណើររបស់លោក។

គួរបញ្ជាក់ថា កូរ៉េខាងត្បូងបានស្នើឲ្យមានកិច្ចចរចាយោធាជាមួយកូរ៉េខាងជើង កាលពីថ្ងៃទី១៧ ខែវិច្ឆិកា ដើម្បីពិភាក្សាអំពីការបង្កើតព្រំដែនច្បាស់លាស់ តាមខ្សែកំណត់ព្រំដែនយោធា (MDL) ក្នុងគោលបំណងការពារការប៉ះទង្គិចប្រដាប់អាវុធ នៅតាមព្រំដែនដែលអាចបង្កឲ្យមានជម្លោះកាន់តែទូលំទូលាយ។ កូរ៉េខាងជើងមិនបានឆ្លើយតប ឬប្រតិកម្ម ចំពោះសំណើនេះឡើយ៕