សមាជិកព្រឹទ្ធសភារបស់គណបក្សប្រជាធិបតេយ្យ នៅថ្ងៃចន្ទ (ទី២៤ ខែវិច្ឆិកា) នេះ បានស្នើឲ្យប្រធានាធិបតីអាមេរិក លោក Donald Trump ឆ្លើយអំពីព័ត៌មានលម្អិតសំខាន់ៗ ស្ដីពីផែនការរបស់ម្ចាស់ជនជាតិចិនរបស់បណ្ដាញសង្គម TikTok ក្នុងការលក់ភាគហ៊ុនភាគច្រើន នៅក្នុងទ្រព្យសម្បត្តិរបស់កម្មវិធីចែករំលែកវីដេអូខ្លីមួយនេះ នៅសហរដ្ឋអាមេរិក។

លោក Trump បានចុះហត្ថលេខាលើក្រឹត្យមួយ កាលពីថ្ងៃទី២៥ ខែកញ្ញា ដែលប្រកាសថា ផែនការលក់ប្រតិបត្តិការរបស់បណ្ដាញសង្គម TikTok នៅសហរដ្ឋអាមេរិក ទៅឲ្យសម្ព័ន្ធអ្នកវិនិយោគអាមេរិក និងសកល បំពេញតាមតម្រូវការសន្តិសុខជាតិដែលមានចែងក្នុងច្បាប់ឆ្នាំ២០២៤ ហើយផ្តល់ពេលវេលាឲ្យពួកគេ ១២០ថ្ងៃ ដើម្បីបញ្ចប់ការលក់ដូរនេះទាំងស្រុង។

ក្នុងការធ្វើដូច្នេះ លោកបានពន្យារពេលរហូតដល់ថ្ងៃទី២០ ខែមករា នូវការអនុវត្តច្បាប់ហាមឃាត់កម្មវិធីនេះដែលត្រូវបានប្រើប្រាស់ដោយជនជាតិអាមេរិកចំនួន ១៧០លាននាក់ ប្រសិនបើក្រុមហ៊ុន ByteDance របស់ចិនមិនលក់វានោះទេ។ តែសមាជិកព្រឹទ្ធសភា លោក Ed Markey បាននិយាយថា សេតវិមានមិនបានឆ្លើយសំណួរជាច្រើន ហើយមិនបានអនុវត្តតាមច្បាប់ឆ្នាំ២០២៤ នោះឡើយ។

នៅក្នុងលិខិតមួយផ្ញើទៅកាន់លោក Trump នៅថ្ងៃទី២៤ ខែវិច្ឆិកានេះ លោក Markey បានរៀបរាប់ថា៖ «ការពន្យារពេលដែលមិនស្របច្បាប់ម្តងហើយម្តងទៀតរបស់អ្នក ពាក់ព័ន្ធនឹងថ្ងៃផុតកំណត់នៃប្រតិបត្តិការលក់ និងការអត្ថាធិប្បាយមិនច្បាស់លាស់ អំពីកិច្ចព្រមព្រៀងនេះ បង្កើតឲ្យមានជាសំណួរធំៗ អំពីថា តើអ្នកអាចធានាឲ្យមានកិច្ចព្រមព្រៀងដែលបន្តប្រតិបត្តិការ TikTok និងដោះស្រាយបញ្ហាសន្តិសុខជាតិដែលបង្កឡើងដោយភាពជាម្ចាស់កម្មសិទ្ធិរបស់ក្រុមហ៊ុន ByteDance លើបណ្ដាញសង្គម TikTok បានដែរ ឬទេ»។ សភា និងប្រជាជនអាមេរិក ត្រូវការយល់ច្បាស់ អំពីលក្ខខណ្ឌ និងស្ថានភាពនៃកិច្ចព្រមព្រៀងដែលត្រូវបានសន្មតនេះ»។

សេតវិមានមិនបានឆ្លើយតបភា្លមៗនោះឡើយ ចំពោះសំណើសុំការអត្ថាធិប្បាយ ពាក់ព័ន្ធនឹងលិខិតរបស់សមាជិកព្រឹទ្ធសភានេះ៕