អភិបាលខេត្ត Songkhla ដែលរួមមានទាំងទីក្រុង Hat Yai ផងដែរ បានប្រកាសតំបន់ទាំងមូលជាតំបន់គ្រោះមហន្តរាយ និងបានបញ្ជាឲ្យមានការជម្លៀសអ្នកស្រុកជាបន្ទាន់ ខណៈដែលភ្លៀងធ្លាក់ខ្លាំងជាបន្តបន្ទាប់ បានធ្វើឲ្យតំបន់មួយចំនួនស្ថិតក្នុងស្ថានភាពវិបត្តិ។

អភិបាលខេត្ត លោក Ratthasart Chidchoo បានចេញសេចក្តីប្រកាស នៅវេលាម៉ោង ១០ព្រឹក (ម៉ោងក្នុងស្រុក) នាថ្ងៃចន្ទ (ទី២៤ ខែវិច្ឆិកា) នេះ ដោយបានប្រកាសតំបន់គ្រោះមហន្តរាយទូទាំងតំបន់រដ្ឋបាលទាំង ១៦។ បទបញ្ជានេះផ្តល់អាទិភាពឲ្យមានការជម្លៀសភ្លាមៗ សម្រាប់ក្រុមមនុស្សងាយរងគ្រោះ ដែលរួមមានកុមារ មនុស្សចាស់ និងអ្នកជំងឺ។ 

អង្គភាពយោធា ស៊ីវិល និងរដ្ឋបាលមូលដ្ឋាន ត្រូវបានដាក់ពង្រាយ ដើម្បីពន្លឿនកិច្ចប្រឹងប្រែងសង្គ្រោះ។ ហើយលោក Ratthasart បាននិយាយថា តំបន់ដែលរងគ្រោះខ្លាំងបំផុត រហូតមកដល់ពេលនេះ គឺនៅតំបន់ Na Thawi ដែលស្ថានភាពត្រូវបានពិពណ៌នាថា «ធ្ងន់ធ្ងរខ្លាំង»។

ទឹកជំនន់ បានកើតមានពាសពេញតំបន់តូចៗចំនួន ១០ និងភូមិ ៩២ នៅទីនោះ ដោយប៉ះពាល់ដោយផ្ទាល់ដល់ប្រជាពលរដ្ឋជាង ១៥.០០០គ្រួសារ ឬជាង ៥ម៉ឺននាក់។ សេចក្តីរាយការណ៍ក្នុងស្រុក បានឲ្យដឹងថា គ្រប់ផ្លូវទាំងតូច និងធំ នៅក្នុងតំបន់នេះ ត្រូវបានកាត់ផ្តាច់ ដែលធ្វើឲ្យការធ្វើដំណើរតាមផ្លូវគោក មិនអាចធ្វើដំណើរបានឡើយ។ ការចូលទៅដល់ប្រជាជនរងគ្រោះ ឥឡូវនេះ គឺពឹងផ្អែកតែលើទូកប៉ុណ្ណោះ។

បើយោងតាមនាយកដ្ឋានធារាសាស្ត្រ បានឲ្យដឹងថា ឥទ្ធិពលខ្យល់មូសុងដ៏ខ្លាំង បានបណ្តាលឲ្យមានភ្លៀងធ្លាក់ច្រើនបំផុតកម្រិត ៦៣០មីលីម៉ែត្រ ក្នុងរយៈពេល ៣ថ្ងៃ ដែលបង្កឲ្យមានទឹកជំនន់ធំខ្លាំងនៅទូទាំងខេត្តភាគខាងត្បូងចំនួន ១០ ដោយ Hat Yai ជួបប្រទះទឹកជំនន់ធ្ងន់ធ្ងរបំផុតមិនធ្លាប់មាន ក្នុងរយៈពេល ៣សតវត្សរ៍៕