ប្រធានាធិបតីអាមេរិក លោក Donald Trump កាលពីថ្ងៃចន្ទ (២៤ វិច្ឆិកា) បានសាទរទំនាក់ទំនងជាមួយចិន ថា "រឹងមាំខ្លាំងណាស់" បន្ទាប់ពីកិច្ចសន្ទនាទូរសព្ទជាមួយមេដឹកនាំចិន លោក Xi Jinping ខណៈប្រធានាធិបតីចិនរូបនេះបានប្រាប់ទៅលោក Trump វិញថា "ការវិលត្រឡប់របស់កោះតៃវ៉ាន់ទៅកាន់ប្រទេសចិនវិញ" គឺជាផ្នែកដ៏សំខាន់នៃចក្ខុវិស័យរបស់ទីក្រុងប៉េកាំង សម្រាប់សណ្តាប់ធ្នាប់ពិភពលោក។

ជំនួបទូរសព្ទនេះ ដែលមិនធ្លាប់ត្រូវប្រកាសដោយប្រទេសទាំងពីរនោះ បានកើតឡើងត្រឹមតែប៉ុន្មានសប្តាហ៍ប៉ុណ្ណោះ បន្ទាប់ពីមេដឹកនាំទាំងពីរបានជួបប្រជុំគ្នានៅកូរ៉េខាងត្បូង ជាទីដែលលោកទាំងពីរបានយល់ព្រមលើក្របខណ្ឌកិច្ចព្រមព្រៀងពាណិជ្ជកម្មមួយ។

ទីភ្នាក់ងារសារព័ត៌មានរដ្ឋចិន ស៊ីនហួរ បានស្រង់សម្តី លោក Xi ដែលនិយាយថា "ចិន និងសហរដ្ឋអាមេរិក ធ្លាប់ប្រយុទ្ធប្រកៀកស្មាគ្នាប្រឆាំងនឹងហ្វាស៊ីសនិយម និងយោធានិយម ហើយឥឡូវនេះ គួរតែធ្វើការរួមគ្នាដើម្បីការពារលទ្ធផលនៃសង្គ្រាមលោកលើកទីពីរ" ដោយបន្ថែមថា "ការវិលត្រឡប់របស់កោះតៃវ៉ាន់ ទៅកាន់ប្រទេសចិន គឺជាផ្នែកដ៏សំខាន់មួយនៃសណ្តាប់ធ្នាប់អន្តរជាតិក្រោយសង្គ្រាម"។

លោក Trump ពុំបានលើកពីកោះតៃវ៉ាន់ ក្នុងការបង្ហោះបណ្ដាញសង្គម Truth Social នៃជំនួបទូរសព្ទ "ដ៏ល្អ" ជាមួយលោក Xi ទេ ដោយគ្រាន់តែនិយាយថា កិច្ចសន្ទនាគ្របដណ្តប់ប្រធានបទជាច្រើន រួមទាំងអ៊ុយក្រែន សារធាតុហ្វង់តានីល និងផលិតផលកសិកម្មរបស់អាមេរិក។

លោកបានសរសេរបង្ហោះថា "ទំនាក់ទំនងអាមេរិកជាមួយចិន រឹងមាំខ្លាំងណាស់! កិច្ចសន្ទនានេះគឺជាការតាមដានកិច្ចប្រជុំដ៏ជោគជ័យរបស់ភាគីទាំងពីរនៅកូរ៉េខាងត្បូង កាលពី ៣សប្តាហ៍មុន។ លោក Trump បន្តថា លោកបានទទួលយកការអញ្ជើញរបស់លោក Xi ឱ្យទៅបំពេញទស្សនកិច្ចនៅទីក្រុងប៉េកាំង ក្នុងខែមេសា (ឆ្នាំ២០២៦) ហើយក៏បានអញ្ជើញលោក Xi សម្រាប់ដំណើរទស្សនកិច្ចផ្លូវរដ្ឋទៅកាន់សហរដ្ឋអាមេរិក នៅពេលក្រោយ ក្នុងឆ្នាំដដែលនោះ៕