បាល់ទាត់៖ ​​អតីត​ខ្សែប្រយុទ្ធ Manchester City, Ferran Torres គឺជា​អ្នក​សង្គ្រោះ Barcelona ពី​បរាជ័យ​ក្នុងការ​ប្រកួត​ក្របខណ្ឌ UEFA Europa League យប់មិញ ក្រោយ​ស៊ុត​បាល់​ពិន័យ ១១ម៉ែត្រ​តាម​ស្មើ​ទល់នឹង​ក្រុម​ភ្ញៀវ​អ៊ីតាលី Napoli​។ ​នេះ​ជាការ​បង្ហាញខ្លួន​លើកដំបូង​ក្នុង​រយៈពេល​ជិត ១៨ឆ្នាំ​របស់ Barcelona នៅ​ក្របខណ្ឌ Europa League តែក្រុម​យក្ស​អេ​ស្ប៉ា​ញ​មួយ​នេះ​ត្រូវបាន​ក្រុម​ភ្ញៀវ Napoli នាំមុខ​នៅ​នាទី​ទី២៩ ដោយ Piotr Zielinski​។

​តែ​ចូល​វគ្គ​ទី២ Barcelona ក៏​ទទួលបាន​បាល់​ពិន័យ ១១ម៉ែត្រ​ដោយ VAR បញ្ជាក់ថា​ បាល់​កាត់​របស់ Adama Traore ប៉ះដៃ​របស់ Juan Jeses​។ ​Ferran Torren ជា​អ្នក​ស៊ុត​សំរេច​ឱ្យ Barcelona តាម​ស្មើ ១-១ នៅ​នាទី​ទី៥៩​។ ​​អតីត​ខ្សែប្រយុទ្ធ Arsenal, Pierre Emerick Aubameyang ក៏បាន​ចាប់ផ្តើម ១១នាក់​លើកដំបូង​ដែរ​ក្នុងការ​ប្រកួត​នេះ តែ​ហាក់​មិនមាន​ឱកាស​អ្វី​ជា​ដុំកំភួន​ឡើយ​ជាមួយ​ក្រុម​ថ្មី Barcelona​។​ ​​ក្រុម​របស់លោក Xavi Hernandez នឹង​ត្រលប់​ទៅ​ទឹកដី​អ៊ីតាលី​របស់ Napoli សំរាប់​ជើង​ទី២ នៅ​ថ្ងៃទី២៤ សប្តាហ៍​ក្រោយ​។​

​​ដោយឡែក​ក្រុម​អាល្លឺម៉ង់ Borussia Dortmund មិនមាន​លទ្ធផល​ល្អ​ឡើយ​យប់មិញ​ក្រោយ​ចាញ់​ក្លិប​ស្កុ​ត​ឡេ​ន Glasgow Rangers ៤-២ ក្នុង​ទឹកដី​ខ្លួនឯង​។ ​​ថ្វីបើ​ចូល​ហ្វឹកហាត់​វិញ​កាលពី​ថ្ងៃ​ពុធដូច​ការរំពឹងទុក Erling Haaland ពិតជា​មិនបាន​ចូល​លេង​មែន​សំរាប់​ការប្រកួត​យប់មិញ​។ ​​Rangers នឹង​​កាន់​គ្រាប់​ចំណេញ​ក្រៅ​ដី​ក្នុង​ជ័យជំនះ ៤-២ នេះ​មុន​ត្រលប់​ទៅ​ទឹកដី​ខ្លួនឯង​វិញ​សប្តាហ៍​ក្រោយ ដោយ​ក្តីសង្ឃឹម​ក្នុងការ​ឈានឡើង​វគ្គ ១៦ក្រុម​ចុងក្រោយ Europa League រដូវ​កាល​នេះ​៕

​អត្ថបទ​៖​នាង សុភា​វុ​ធ