ក្រុមមន្ត្រីសហរដ្ឋអាមេរិក និងអ៊ុយក្រែន កាលពីថ្ងៃចន្ទ (២៤ វិច្ឆិកា) បានព្យាយាមផ្សារភ្ជាប់ការខ្វែងគំនិតរវាងភាគីទាំងពីរ ជុំវិញផែនការបញ្ចប់សង្រ្គាមនៅអ៊ុយក្រែន បន្ទាប់ពីបានយល់ព្រមកែប្រែសំណើរបស់សហរដ្ឋអាមេរិក ដែលទីក្រុងគីវ និងសម្ព័ន្ធមិត្តអឺរ៉ុបរបស់ខ្លួន មើលឃើញថាជាបញ្ជីបំណងប្រាថ្នារបស់វិមានក្រឹមឡាំង។

ក្នុងសេចក្តីថ្លែងការណ៍រួមមួយ ទីក្រុងវ៉ាស៊ីនតោននិងទីក្រុងគីវបាននិយាយថា ភាគីទាំងពីរបាន "ចម្រាញ់នូវសេចក្ដីព្រាងក្របខណ្ឌសន្តិភាព" មួយ បន្ទាប់ពីកិច្ចពិភាក្សានៅទីក្រុងហ្សឺណែវ កាលពីថ្ងៃអាទិត្យ។ ទោះបីជាពុំមានខ្លឹមសារជាក់លាក់ក៏ដោយ ប៉ុន្តែកិច្ចពិភាក្សានៅស្វីសនោះ ទទួលបានការស្វាគមន៍យ៉ាងប្រុងប្រយ័ត្នពីសម្ព័ន្ធមិត្តមួយចំនួនរបស់អ៊ុយក្រែន។

ប្រធានាធិបតីអ៊ុយក្រែន លោក Volodymyr Zelenskyy បាននិយាយថា គណៈប្រតិភូអ៊ុយក្រែន ដែលចូលរួមក្នុងកិច្ចពិភាក្សាជាមួយមន្ត្រីអាមេរិកនៅស្វីស កំពុងត្រឡប់ទៅប្រទេសវិញកាលពីថ្ងៃចន្ទ ដើម្បីរាយការណ៍លទ្ធផល។ ប្រធានាធិបតីអាមេរិក លោក Donald Trump ក៏បានលើកពីវឌ្ឍនភាពថ្មីលើកិច្ចពិភាក្សានោះដែរ។

ក្រោយមកនៅឯសេតវិមាន អ្នកនាំពាក្យ លោកស្រី Karoline Leavitt បាននិយាយថា មានការខ្វែងគំនិតគ្នាប៉ុន្មានចំណុចដែលនៅសេសសល់ ប៉ុន្តែ "អាមេរិកមានទំនុកចិត្តថា នឹងអាចដោះស្រាយរឿងទាំងនោះបាន"។ ក្នុងសុន្ទរកថាវីដេអូពេលយប់របស់ខ្លួន លោក Zelenskyy បាននិយាយថា ឥឡូវនេះ ផែនការសន្តិភាពបានដាក់បញ្ចូលចំណុច "ត្រឹមត្រូវ" ហើយ ប៉ុន្តែបញ្ហារសើបនឹងត្រូវយកទៅពិភាក្សាជាមួយលោក Trump បន្តទៀត៕