ប្រទេសចិនបានហៅផែនការរបស់ប្រទេសជប៉ុនក្នុងការដាក់ពង្រាយមីស៊ីលនៅលើកោះមួយក្បែរកោះតៃវ៉ាន់ថាជាការប៉ុនប៉ងដោយចេតនាដើម្បីបង្កើតភាពតានតឹងក្នុងតំបន់ និងញុះញង់ឱ្យមានការប្រឈមដាក់គ្នាខាងយោធាកាលពីថ្ងៃចន្ទ២៤វិច្ឆិកាដើមសប្ដាហ៍នេះ ខណៈជម្លោះការទូតកំពុងពុះកញ្ជ្រោលខ្លាំងរវាងប្រទេសទាំងពីរ។

អ្នកនាំពាក្យក្រសួងការបរទេសចិន លោកស្រី Mao Ning បាននិយាយកាលពីថ្ងៃចន្ទដដែលនោះថា ចេតនារបស់ជប៉ុនក្នុងការដាក់ពង្រាយអាវុធវាយប្រហារនៅជិតតំបន់តៃវ៉ាន់របស់ចិនតម្រូវឱ្យមានការប្រុងប្រយ័ត្នខ្ពស់ពីសហគមន៍អន្តរជាតិ។

លោកស្រី Mao បានគូសបញ្ជាក់ថា រួមជាមួយនឹងការអត្ថាធិប្បាយមិនត្រឹមត្រូវថ្មីៗនេះលើកោះតៃវ៉ាន់ដែលធ្វើឡើងដោយនាយករដ្ឋមន្ត្រីជប៉ុន លោកស្រី Sanae Takaichi និន្នាការនេះគឺមានគ្រោះថ្នាក់ខ្លាំង ហើយគួរតែបង្កើនការព្រួយបារម្ភក្នុងចំណោមប្រទេសជិតខាង និងសហគមន៍អន្តរជាតិកាន់តែទូលំទូលាយ។

អ្នកនាំពាក្យក្រសួងការបរទេសចិនរូបនេះ បានសង្កត់ធ្ងន់ថា ប្រទេសចិននឹងមិនដែលអនុញ្ញាតឱ្យកងកម្លាំងស្តាំនិយមជប៉ុនបញ្ច្រាស់ដំណើរនៃប្រវត្តិសាស្ត្រឡើយ នឹងមិនដែលអនុញ្ញាតឱ្យកងកម្លាំងខាងក្រៅជ្រៀតជ្រែកក្នុងតំបន់តៃវ៉ាន់របស់ចិនជាដាច់ខាត ហើយក៏នឹងមិនដែលអនុញ្ញាតឱ្យយោធានិយមជប៉ុនរស់ឡើងវិញដែរ។ ប្រទេសចិនមានការតាំងចិត្ត និងសមត្ថភាពក្នុងការការពារអធិបតេយ្យភាពជាតិ និងបូរណភាពទឹកដីរបស់ខ្លួន។   

គួររម្លឹកថា ជម្លោះការទូតរវាងចិននិងជប៉ុន កាន់តែក្ដៅខ្លាំង ចាប់តាំងពីលោកស្រីនាយករដ្ឋមន្ត្រីជប៉ុន Sanae Takaichi ប្រាប់សភាកាលពីថ្ងៃទី៧វិច្ឆិកា ២០២៥ ថា ការវាយក្រសោបរបស់ចិនលើកោះស្វ័យគ្រប់គ្រងតៃវ៉ាន់ អាចបង្កឱ្យមានការឆ្លើយតបខាងយោធាពីទីក្រុងតូក្យូ៕