អនុស្សរណៈផ្ទៃក្នុងរបស់រដ្ឋាភិបាលអាមេរិក ដែលមើលឃើញដោយសារព័ត៌មានរ៉យទ័រ បានឱ្យដឹងថា រដ្ឋបាលលោកប្រធានាធិបតីអាមេរិក Donald Trump បានបញ្ជាឱ្យពិនិត្យឡើងវិញយ៉ាងទូលំទូលាយ លើជនភៀសខ្លួនទាំងអស់ដែលចូលទៅសហរដ្ឋអាមេរិក ក្រោមរដ្ឋបាលរបស់អតីតប្រធានាធិបតី Joe Biden នៅក្នុងជំហានដ៏ភ្ញាក់ផ្អើលមួយដែលអាចគាស់កកាយឡើងវិញនូវករណីរបស់មនុស្សរាប់ពាន់នាក់ ដែលស្វែងរកការការពារពីសហរដ្ឋអាមេរិក។

បទបញ្ជានេះនឹងអនុវត្តចំពោះជនភៀសខ្លួនប្រហែល ២៣៣.០០០នាក់ ដែលបានចូលនៅចន្លោះថ្ងៃទី២០ ខែមករា ឆ្នាំ២០២១ ដល់ថ្ងៃទី២០ ខែកុម្ភៈ ឆ្នាំ២០២៥ នេះបើតាមអនុស្សរណៈដែលចុះហត្ថលេខាដោយលោក Joe Edlow ប្រធានសេវាសញ្ជាតិ និងអន្តោប្រវេសន៍អាមេរិក (USCIS)។ ឯកសារនេះក៏បញ្ជាឱ្យបញ្ឈប់នូវរាល់ដំណើរការពាក្យស្នើសុំស្នាក់នៅអចិន្ត្រៃយ៍ សម្រាប់ជនភៀសខ្លួនដែលចូលទៅអាមេរិក ក្រោមរដ្ឋបាលលោក Biden។

លោក Trump បានផ្អាកទទួលយកជនភៀសខ្លួនពីជុំវិញពិភពលោក នៅពេលចូលកាន់តំណែងក្នុងខែមករា ឆ្នាំ២០២៥នេះ ជាផ្នែកមួយនៃការបង្រ្កាបយ៉ាងទូលំទូលាយលើអន្តោប្រវេសន៍ទាំងស្របច្បាប់ និងខុសច្បាប់។ វិធីសាស្រ្តដ៏តឹងរ៉ឹងរបស់លោក Trump គឺផ្ទុយគ្នាខ្លាំងពីលោក Biden ដែលអំឡុងរដ្ឋបាលរបស់លោក បានស្វាគមន៍ជនភៀសខ្លួនជាង ១សែននាក់ ក្នុងឆ្នាំសារពើពន្ធ២០២៤។

អនុស្សរណៈរបស់សេវា USCIS ចុះថ្ងៃទី២១ ខែវិច្ឆិកា បាននិយាយថា ទីភ្នាក់ងារនេះនឹងបញ្ចប់ស្ថានភាពជនភៀសខ្លួនរបស់អ្នកដែលកំពុងនៅក្នុងសហរដ្ឋអាមេរិករួចទៅហើយ ប្រសិនបើរកឃើញថា អ្នកទាំងនោះមិនបំពេញតាមលក្ខណៈវិនិច្ឆ័យជនភៀសខ្លួន។ អនុស្សរណៈនេះអះអាងថា រដ្ឋបាលលោក Biden ប្រហែលជាបានផ្តល់អាទិភាពលើភាពរហ័ស បរិមាណ និងពាក្យស្នើសុំ ជំនួសឱ្យការសម្ភាសន៍ប្រកបដោយគុណភាព ល្អិតល្អន់ និងការត្រួតពិនិត្យគ្រប់ជ្រុយជ្រោយ។

កាលពីចុងខែតុលា លោក Trump បានកំណត់ការទទួលយកជនភៀសខ្លួនសម្រាប់ឆ្នាំសារពើពន្ធ ២០២៦ នៅកម្រិតទាបបំផុតត្រឹម ៧.៥០០នាក់ប៉ុណ្ណោះ៕