នាយករដ្ឋមន្ត្រីជប៉ុន លោកស្រី Sanae Takaichi និងលោកប្រធានាធិបតីអាមេរិក Donald Trump បានពិភាក្សាអំពីទំនាក់ទំនងចិន នៅក្នុងជំនួបទូរសព្ទមួយនៅថ្ងៃអង្គារ (២៥ វិច្ឆិកា) នេះ ដែលជាកិច្ចពិភាក្សាលើកដំបូងហើយរបស់មេដឹកនាំទាំងពីរ ចាប់តាំងពីនាយករដ្ឋមន្ត្រីជប៉ុនរូបនេះ មានជម្លោះការទូតដ៏ធំមួយជាមួយទីក្រុងប៉េកាំង ជុំវិញការលើកឡើងរបស់លោកស្រីលើកោះតៃវ៉ាន់។

ការឆ្លើយតបរបស់លោកស្រី Takaichi ទៅនឹងសំណួរមួយក្នុងសភាកាលពីដើមខែវិច្ឆិកានេះ ដែលថា ការវាយក្រសោបរបស់ចិនលើកោះតៃវ៉ាន់ អាចនាំឱ្យមានការឆ្លើយតបខាងយោធាពីជប៉ុន បានជំរុញឱ្យមានការមិនពេញចិត្តខ្លាំងពីទីក្រុងប៉េកាំង។

បន្ទាប់ពីកិច្ចសន្ទនាជាមួយលោក Trump នៅថ្ងៃអង្គារនេះ លោកស្រី Takaichi បានប្រាប់អ្នកយកព័ត៌មានថា "ប្រធានាធិបតី Trump បានផ្តល់ការពន្យល់ខ្លីៗពីស្ថានភាពថ្មីៗនៃទំនាក់ទំនងអាមេរិក និងចិន" ប៉ុន្តេបដិសេធមិនធ្វើសេចក្តីលម្អិតបន្ថែមនោះទេ។

នៅមុននោះ ទីភ្នាក់ងារព័ត៌មានចិនស៊ិនហួរ រាយការណ៍ថា ប្រធានាធិបតីចិន លោក Xi Jinping បានប្រាប់លោក Trump ក្នុងជំនួបទូរសព្ទមួយកាលពីថ្ងៃចន្ទថា "ការវិលត្រឡប់របស់កោះតៃវ៉ាន់" ទៅកាន់ប្រទេសចិន គឺជាផ្នែកមួយដ៏សំខាន់នៃចក្ខុវិស័យរបស់ទីក្រុងប៉េកាំង សម្រាប់សណ្តាប់ធ្នាប់ពិភពលោក។ លោក Trump វិញក៏បានសាទរទំនាក់ទំនងដ៏រឹងមាំជាមួយចិន ក្រោយកិច្ចសន្ទនានេះ ប៉ុន្តែមិនបានលើកពីកោះតៃវ៉ាន់នោះទេ៕