អ្នកនាំពាក្យក្រុមតាលីបង់ នៅអាហ្វហ្គានីស្ថាន លោក Zabihullah Mujahid បាននិយាយនៅថ្ងៃអង្គារ (២៥ វិច្ឆិកា) នេះថា កុមារយ៉ាងតិច ៩នាក់ និងស្ត្រីម្នាក់ ត្រូវបានសម្លាប់ បន្ទាប់ពីកងកម្លាំងប៉ាគីស្ថាន បានទម្លាក់គ្រាប់បែកលើលំនៅឋានអ្នកស្រុកនៅខេត្ត Khost ក្នុងប្រទេសអាហ្វហ្គានីស្ថាន។

លោក Mujahid បន្តថា ប៉ាគីស្ថានក៏បានធ្វើប្រតិបត្តិការវាយឆ្មក់នៅក្នុងខេត្ត Kunar និង Paktika ដោយបានបណ្តាលឱ្យជនស៊ីវិលមួយចំនួនទៀតរងរបួស។

យោធា និងក្រសួងការបរទេសប៉ាគីស្ថាន មិនទាន់អត្ថាធិប្បាយលើរឿងនេះទេ។ ការវាយឆ្មក់នេះកើតឡើងត្រឹមតែមួយថ្ងៃប៉ុណ្ណោះបន្ទាប់ពីការបំផ្ទុះគ្រាប់បែកអត្តឃាត ២លើក បានសម្លាប់បុគ្គលិកយោធាប៉ារ៉ា ៣នាក់ នៅក្រុង Peshawar ក្នុងប្រទេសប៉ាគីស្ថាន។

គួរឱ្យដឹងថា យោធាប៉ាគីស្ថាន និងអាហ្វហ្គានីស្ថាន បានប៉ះទង្គិចគ្នាក្នុងខែតុលា ដោយបានសម្លាប់មនុស្សរាប់សិបនាក់ នៅក្នុងអំពើហិង្សាដ៏អាក្រក់បំផុត ចាប់តាំងពីពួកតាលីបង់ បានកាន់អំណាចនៅអាហ្វហ្គានីស្ថាន ក្នុងឆ្នាំ២០២១មក។ ភាគីទាំងពីរបានចុះហត្ថលេខាលើបទឈប់បាញ់នៅទីក្រុងដូហា កាលពីខែតុលា ប៉ុន្តែកិច្ចចរចាសន្តិភាពនៅទួរគី បានដួលរលំ ដោយពុំមានកិច្ចព្រមព្រៀងរយៈពេលវែងនោះទេ ក្រោមការខ្វែងគំនិតលើក្រុមសកម្មប្រយុទ្ធ ដែលមានអរិភាពចំពោះប៉ាគីស្ថាន៕