ប្រធានាធិបតីសហរដ្ឋអាមេរិក លោក Donald Trump បានបញ្ជាឱ្យជំនួយការរបស់លោកចាប់ផ្តើមដំណើរការមួយដើម្បីដាក់សាខាអង្គការ Muslim Brotherhood នៅក្នុងប្រទេសអេហ្ស៊ីប លីបង់ និងហ្ស៊កដានី ជាអង្គការ «ភេរវករ» ដោយលើកឡើងពីការគាំទ្ររបស់ក្រុមនេះសម្រាប់ក្រុមហាម៉ាសប៉ាឡេស្ទីន។

លោក Trump បានចេញក្រឹត្យនេះកាលពីថ្ងៃចន្ទ ខណៈទីក្រុងវ៉ាស៊ីនតោនបានបង្កើនការបង្ក្រាបរបស់ខ្លួនលើសត្រូវរបស់អ៊ីស្រាអែលនៅក្នុងតំបន់។ ក្រឹត្យនេះបានចោទប្រកាន់មេដឹកនាំអង្គការ Muslim Brotherhood នៅក្នុងប្រទេសហ្ស៊កដានី ថាបានផ្តល់ «ការគាំទ្រសម្ភារៈ» ដល់ក្រុមហាម៉ាស និងសាខានៅប្រទេសលីបង់របស់ក្រុមនេះ ដែលគេស្គាល់ថា al-Jamaa al-Islamiya ថាបានចូលដៃជាមួយក្រុមហាម៉ាស និងក្រុមហេសបូឡា ក្នុងសង្គ្រាមរបស់ពួកគេ ជាមួយអ៊ីស្រាអែល។

ក្រឹត្យនេះក៏បានអះអាងផងដែរថា មេដឹកនាំអង្គការ Muslim Brotherhood នៅអេហ្ស៊ីបម្នាក់ «បានអំពាវនាវឱ្យមានការវាយប្រហារដោយហិង្សាទៅលើដៃគូនិងផលប្រយោជន៍របស់សហរដ្ឋអាមេរិក» ក្នុងអំឡុងសង្គ្រាមរបស់អ៊ីស្រាអែលនៅតំបន់ហ្កហ្សា។

សេតវិមានបាននិយាយថា «លោកប្រធានាធិបតី Trump កំពុងប្រឈមនឹងបណ្តាញឆ្លងដែនរបស់ អង្គការ Muslim Brotherhood ដែលជំរុញឱ្យមានភេរវកម្ម និងយុទ្ធនាការអស្ថិរភាពប្រឆាំងនឹងផលប្រយោជន៍ និងសម្ព័ន្ធមិត្តរបស់សហរដ្ឋអាមេរិកនៅតំបន់មជ្ឈិមបូព៌ា»។