កងកម្លាំងគាំទ្ររហ័ស(RSF) នៅប្រទេសស៊ូដង់ បានប្រកាសពីបទឈប់បាញ់មនុស្សធម៌ដែលទំនងជាឯកតោភាគី រយៈពេលបីខែ នៅក្នុងសង្គ្រាមស៊ីវិលរបស់ប្រទេសនេះ។

មេបញ្ជាការកងកម្លាំងគាំទ្ររហ័ស(RSF) លោក Mohamed Hamdan Dagalo ដែលត្រូវបានគេស្គាល់ថា Hemedti បានធ្វើសេចក្តីប្រកាសនេះកាលពីថ្ងៃចន្ទនៅក្នុងសុន្ទរកថាដែលត្រូវបានថតទុក។

កងកម្លាំងប្រដាប់អាវុធស៊ូដង់ (SAF) ដឹកនាំដោយឧត្តមសេនីយ៍ Abdel Fattah al-Burhan ពុំបានបញ្ជាក់ភ្លាមៗថាតើកិច្ចព្រមព្រៀងណាមួយត្រូវបានឈានដល់នោះទេ។

កាលពីថ្ងៃចន្ទ លោក Hemedti បាននិយាយថាកងកម្លាំងគាំទ្ររហ័ស(RSF) បានព្រមព្រៀងចំពោះបទឈប់បាញ់នេះក្នុងកិច្ចសហប្រតិបត្តិការជាមួយក្រុមប្រទេសក្វាដ(Quad) សហភាពអាហ្វ្រិក និងប្លុកអាជ្ញាធរអន្តររដ្ឋាភិបាលប្រចាំតំបន់លើប្លុកអភិវឌ្ឍន៍(IGAD) និងបានព្យាយាមបង្កើនការការពារជនស៊ីវិល និងសម្របសម្រួលដល់ការផ្តល់ជំនួយមនុស្សធម៌។

កងកម្លាំង RSF ធ្លាប់បានប្រកាសកាលពីដើមខែនេះថា ក្រុមនេះបានព្រមព្រៀងលើសំណើបទឈប់បាញ់ដែលបានដាក់ចេញដោយក្រុមប្រទេសក្វាដ(Quad) ប៉ុន្តែបានបន្តការវាយប្រហារដោយយានដ្រូនលើទឹកដីដែលកាន់កាប់ដោយកងកម្លាំងប្រដាប់អាវុធស៊ូដង់(SAF) ភ្លាមៗក្រោយមក។

លោក Hemedti បានចាត់ទុកការផ្អាកជាឯកតោភាគីនេះថាជាជំហានដំបូងក្នុងការឈានដល់ដំណោះស្រាយនយោបាយចំពោះការប្រយុទ្ធគ្នា ដែលបានចាប់ផ្តើមកាលពីក្នុងខែមេសា ឆ្នាំ២០២៣ បន្ទាប់ពីកិច្ចព្រមព្រៀងបែងចែកអំណាចដ៏ទន់ខ្សោយរវាងលោក al-Burhan និងលោក Hemedti បានបរាជ័យ។