ប្រធានក្រុមប្រឹក្សាភិបាលប្រព័ន្ធផ្សព្វផ្សាយ BBC បានប្រាប់សភាអង់គ្លេសក្នុងអំឡុងពេលសវនាការគណៈកម្មាធិការ កាលពីថ្ងៃចន្ទ ទី២៤ ខែវិច្ឆិកាថា ការដោះស្រាយនៃរបាយការណ៍អំពីភាពលំអៀងចំពោះប្រព័ន្ធផ្សព្វផ្សាយសាធារណៈមួយនេះ ពុំមានភាពវឹកវរទេ។ លោក Samir Shah បាននិយាយថា ក្រុមប្រឹក្សាភិបាលមានចំណាត់ការទាន់ពេលវេលា និងបានការពារសមាជិកក្រុមប្រឹក្សាភិបាល លោក Robbie Gibb ប្រឆាំងនឹងការចោទប្រកាន់អំពីភាពលំអៀង។ លោកបាននិយាយថា ប្រព័ន្ធផ្សព្វផ្សាយ បានចាត់វិធានការលើទិដ្ឋភាពជាច្រើនដើម្បីឆ្លើយតបទៅនឹងការរិះគន់។

លោក Michael Prescott អតីតទីប្រឹក្សាផ្នែកវិចារណកថាខាងក្រៅ បានចងក្រងឯកសារស្តីពីបញ្ហានៅក្នុងប្រព័ន្ធផ្សព្វផ្សាយ BBC News រួមទាំងការបរាជ័យក្នុងការកែសម្រួលសុន្ទរកថារបស់ប្រធានាធិបតីសហរដ្ឋអាមេរិក លោក Donald Trump និងការចោទប្រកាន់អំពីភាពលំអៀងក្នុងការផ្សាយព័ត៌មានរបស់ខ្លួនអំពីសង្គ្រាមអ៊ីស្រាអែល-ក្រុមហាម៉ាស និងបញ្ហាអ្នកប្តូរភេទ។

បញ្ហាដ៏ខ្លាំងក្លាបំផុតរបស់ខ្លួនគឺ កម្មវិធីវីដេអូឯកសារដ៏សំខាន់របស់ BBC ដែលបានកែសម្រួលឃ្លីបវីដេអូខ្លីៗពីសុន្ទរកថារបស់លោក Trump នៅថ្ងៃដែលអ្នកគាំទ្ររបស់លោកបានចូលលុកលុយនៅវិមានកាពីតូលកាលពីក្នុងឆ្នាំ២០២១ ដែលធ្វើឱ្យវាមើលទៅដូចជាលោកបានគាំទ្រអំពើហិង្សា។

របាយការណ៍នោះត្រូវបានបែកធ្លាយទៅកាន់កាសែត Daily Telegraph ដែលបង្កឱ្យមានការលាលែងពីតំណែងរបស់លោក Tim Davie អគ្គនាយក BBC និងលោកស្រី Deborah Turness ប្រធានផ្នែកព័ត៌មាន ព្រមទាំងការគំរាមកំហែងរបស់លោក Trump ក្នុងការប្តឹងទាមទារសំណងរហូតដល់៥ពាន់លានដុល្លារ ដែលធ្វើឱ្យប្រព័ន្ធផ្សព្វផ្សាយព័ត៌មានសាធារណៈមួយនេះ ធ្លាក់ចូលក្នុងវិបត្តិ។