សហរដ្ឋអាមេរិក កាលពីថ្ងៃចន្ទ ទី២៤ ខែវិច្ឆិកា បានជំរុញឱ្យប្រទេសនានា គាំទ្រផែនការ២០ចំណុចរបស់ប្រធានាធិបតី លោក Donald Trump សម្រាប់តំបន់ហ្កាហ្សា ខណៈប្រទេសដទៃទៀតបានព្រមានអំពីអំពើហិង្សាកើនឡើងរបស់អ្នកតាំងលំនៅឋានជនជាតិអ៊ីស្រាអែលនៅក្នុងតំបន់ West Bank។

លោក Riyad Mansour បេសកជនប៉ាឡេស្ទីនបានព្រមានថា ពលរដ្ឋប៉ាឡេស្ទីននៅតែត្រូវបានសម្លាប់ និងធ្វើឲ្យរងរបួសទោះបីជាមានបទឈប់បាញ់ក៏ដោយ ដោយចោទប្រកាន់អ៊ីស្រាអែលថាបានធ្វើឱ្យអន្តរាយដល់បទឈប់បាញ់តាមរយៈការជម្លៀស ការចូលកាន់កាប់ និងការដាក់បញ្ចូលជាឧបសម្ព័ន្ធដែនដីជាបន្តបន្ទាប់។

លោកបាននិយាយថា ពលរដ្ឋប៉ាឡេស្ទីនជាង ១.០០០នាក់ត្រូវបានសម្លាប់ ឬធ្វើឲ្យរងរបួស ចាប់តាំងពីបទឈប់បាញ់ចាប់ផ្តើម ហើយប្រជាជននៅតំបន់ហ្កាហ្សា មានការព្រួយបារម្ភថានឹងបាត់បង់ «ពាក់កណ្តាលនៃទឹកដីរបស់ពួកគេ»។

ចក្រភពអង់គ្លេស និងប្រទេសបារាំង បានលើកឡើងពីការព្រួយបារម្ភអំពីការវាយប្រហាររបស់អ្នកតាំងលំនៅឋានដែលកំពុងកើនឡើង និងការពង្រីកយ៉ាងឆាប់រហ័សនៃការតាំងលំនៅឋានរបស់ជនជាតិអ៊ីស្រាអែលនៅក្នុងតំបន់ West Bank។ អ៊ីស្រាអែលបាននិយាយថា នឹងប្រកាន់ខ្ជាប់តាមការប្តេជ្ញាចិត្តរបស់ខ្លួនក្រោមផែនការនេះ ប៉ុន្តែនឹងធ្វើសកម្មភាពប្រឆាំងការគំរាមកំហែងដែលត្រូវបានរាយការណ៍។