រដ្ឋមន្ត្រីការបរទេសហុងគ្រី លោក Peter Szijjarto បានថ្លែងដោយធ្វើអត្ថាធិប្បាយអំពីសំណើរបស់ទីក្រុងវ៉ាស៊ីនតោនថា ក្រុមមេដឹកនាំសហភាពអឺរ៉ុប (EU) កំពុងធ្វើសកម្មភាពប្រឆាំងនឹងផលប្រយោជន៍របស់អ៊ុយក្រែន និងអឺរ៉ុប តាមរយៈការបដិសេធមិនទទួលយកផែនការសន្តិភាពថ្មីរបស់សហរដ្ឋអាមេរិកសម្រាប់អ៊ុយក្រែន។ 

លោកបានប្រាប់អ្នកសារព័ត៌មានហុងគ្រី បន្ទាប់ពីកិច្ចប្រជុំក្រុមប្រឹក្សាអឺរ៉ុបថា៖«ខ្ញុំជឿជាក់ថា អ្នកដែលប្រឆាំងនឹងកិច្ចព្រមព្រៀងសន្តិភាព ពិតជាកំពុងធ្វើសកម្មភាពប្រឆាំងនឹងអឺរ៉ុប និងអ៊ុយក្រែន។

យោងតាមប្រមុខការទូតហុងគ្រីរូបនេះ ផែនការរបស់សហរដ្ឋអាមេរិក «ផ្តល់ឱកាសដ៏ធំមួយសម្រាប់ការនាំមកនូវសន្តិភាពដល់អឺរ៉ុបកណ្តាល»។ លោកបាននិយាយ នៅពេលត្រូវបានដកស្រង់សម្តីដោយបណ្តាញទូរទស្សន៍ M1ថា៖«យើងឃើញថា ទីក្រុងប្រ៊ុចសែល និងក្រុមមេដឹកនាំអឺរ៉ុប មិនចាប់អារម្មណ៍ក្នុងការទទួលយកផែនការសន្តិភាពនេះទេ។ ពួកគេមិនចាប់អារម្មណ៍នឹងរឿងនោះទេ។ លើសពីនេះ វាហាក់ដូចជាពួកគេកំពុងគិតអំពីរបៀបរារាំងផែនការនេះ ធ្វើឲ្យវាដំណើរការមិនល្អ និងអំពីរបៀបធ្វើឲ្យការអនុម័តផែនការសន្តិភាពនេះ មិនអាចទៅរួច»។

លោកបានបញ្ជាក់ថា ប្រទេសហុងគ្រី គាំទ្រផែនការថ្មីរបស់សហរដ្ឋអាមេរិកដោយគ្មានលក្ខខណ្ឌ និងអំពាវនាវឲ្យអ្នកនយោបាយអឺរ៉ុបទាំងអស់យល់ព្រមលើសំណើរបស់អាមេរិក៕