ប្រទេសស៊ុយអែត កំពុងខិតខំប្រឹងប្រែងដើម្បីធ្វើឱ្យប្រសើរឡើងនូវសមត្ថភាពយានដ្រូនរបស់ខ្លួន និងដាក់បញ្ចូលទៅក្នុងកងកម្លាំងប្រដាប់អាវុធជាមួយនឹងមជ្ឈមណ្ឌលហ្វឹកហ្វឺនដែលទើបបើកកាលពីពេលថ្មីៗនេះ ខណៈសង្គ្រាមនៅអ៊ុយក្រែនបានផ្លាស់ប្តូរសមរភូមិ។

ដោយមានត្រឹមតែយានដ្រូនធំៗមួយចំនួនកាលពីប៉ុន្មានឆ្នាំមុន ប្រទេសស៊ុយអែតបច្ចុប្បន្នកំពុងដាក់បញ្ចូលយានដ្រូនប្រហែលដប់ប្រភេទ ដែលមួយចំនួនបានទិញឬផលិតក្នុងចំនួនដ៏ច្រើន ដើម្បីជួយគាំទ្រដល់កងកម្លាំងរបស់ខ្លួននៅក្នុងសមរភូមិ។

មជ្ឈមណ្ឌលយានដ្រូនរបស់កងកម្លាំងប្រដាប់អាវុធនៅក្រុង Karlsborg ដែលត្រូវបានបើកជាផ្លូវការកាលពីដើមឆ្នាំនេះ បានធ្វើតេស្តយានដ្រូន និងអប់រំគ្រូបណ្តុះបណ្តាល។ ពួកគេអាចរៀនពីបទពិសោធន៍នៅអ៊ុយក្រែន និងសម្របខ្លួនទៅនឹងស្ថានភាពរបស់ស៊ុយអែត។

លោក Michael Gunnerek ប្រធានមជ្ឈមណ្ឌលនៅក្រុង Karlsborg បាននិយាយថា យានដ្រូនភាគច្រើនត្រូវបានផលិតរួចរាល់ ប៉ុន្តែមជ្ឈមណ្ឌលយានដ្រូនកំពុងធ្វើការជាមួយរដ្ឋបាលសម្ភារៈការពារជាតិស៊ុយអែត ដើម្បីផ្គត់ផ្គង់យានដ្រូនដែលផលិតតាមតម្រូវការរបស់ស៊ុយអែត។