ប្រទេសទួរគី និងកូរ៉េខាងត្បូង បានចុះហត្ថលេខាលើអនុស្សរណៈនៃការយោគយល់(MOU) កាលពីថ្ងៃចន្ទ ក្នុងអំឡុងដំណើរទស្សនកិច្ចរបស់ប្រធានាធិបតីកូរ៉េខាងត្បូង លោក Lee Jae Myung ទៅកាន់ទីក្រុងអង់ការ៉ា ក្នុងគោលបំណងពង្រឹងកិច្ចសហប្រតិបត្តិការលើវិស័យថាមពលនុយក្លេអ៊ែរ។

នៅក្នុងសន្និសីទសារព័ត៌មានរួមជាមួយប្រធានាធិបតីកូរ៉េខាងត្បូង ប្រធានាធិបតីទួរគី លោក Tayyip Erdogan បាននិយាយថា ការចរចាជាមួយកូរ៉េខាងត្បូងលើការសាងសង់រោងចក្រថាមពលនុយក្លេអ៊ែរមួយនៅក្នុងប្រទេសទួរគីកំពុងបន្ត។

កូរ៉េខាងត្បូង កំពុងស្វែងរកឱកាសសហប្រតិបត្តិការដ៏មានសក្តានុពលលើរោងចក្រថាមពលនុយក្លេអ៊ែរទីពីរដែលបានគ្រោងទុករបស់ប្រទេសទួរគីនៅក្នុងខេត្ត Sinop ភាគខាងជើង។ យោងតាមលោក Erdogan មេដឹកនាំទាំងពីរក៏បានពិភាក្សាអំពីកិច្ចសហប្រតិបត្តិការក្នុងវិស័យឧស្សាហកម្មការពារជាតិអំឡុងជំនួបផងដែរ។

លោក Lee បាននិយាយថា ប្រទេសទាំងពីរបានបញ្ជាក់ជាថ្មីនូវភាពជាដៃគូយុទ្ធសាស្ត្ររបស់ខ្លួន ដោយបង្ហាញពីទំនុកចិត្តថា ទំនាក់ទំនងទាំងនេះនឹងត្រូវបានពង្រឹងបន្ថែម និងបន្តទៅមនុស្សជំនាន់ក្រោយៗទៀត។

លោក Lee និយាយថា «ប្រទេសទួរគី ដែលមានទីតាំងនៅចំណុចប្រសព្វនៃទ្វីបអឺរ៉ុប និងអាស៊ី បានក្លាយជាមូលដ្ឋានដ៏រឹងមាំមួយសម្រាប់ក្រុមហ៊ុនកូរ៉េ ដែលកំពុងស្វែងរកការចូលទៅកាន់ទីផ្សារអឺរ៉ុប» ហើយប្រទេសកូរ៉េខាងត្បូងប្តេជ្ញាក្នុងការពង្រឹងកិច្ចសហប្រតិបត្តិការយុទ្ធសាស្ត្ររួមជាមួយប្រទេសទួរគី ក្នុងវិស័យដូចជា ថាមពលកកើតឡើងវិញ បញ្ញាសិប្បនិម្មិត វិទ្យាសាស្ត្រនិងបច្ចេកវិទ្យាទំនើប។