ភ្នំពេញ៖ ប្រមុខរាជរដ្ឋាភិបាលកម្ពុជា កាលពីម្សិលមិញនេះ បានអនុញ្ញាតឱ្យក្រសួងសុខាភិបាលរៀបចំការចាក់វ៉ាក់សាំងបង្ការកូវីដ-១៩ ជូនកុមារអាយុចាប់ពី ៣ឆ្នាំទៅក្រោម៥ឆ្នាំ។ ការសម្រេចនេះ ធ្វើឡើងស្របពេលដែល​ កម្ពុជាមានការរីករាលដាលកូវីដ-១៩ ជាច្រើនករណីរៀងរាល់ថ្ងៃ។ ការសម្រេចថ្មីនេះ គឺទទួលបានការសាទរពីប្រជាពលរដ្ឋ ជាពិសេសអាណាព្យាបាលដែលមានកូនតូចស្ថិតក្នុងក្រុមអាយុនេះ។

ក្រសួងសុខាភិបាល បានសម្រេចជ្រើសរើសថ្ងៃទី២៣ ខែកុម្ភៈ ឆ្នាំ២០២២ខាងមុខនេះ សម្រាប់ការចាប់ផ្ដើមយុទ្ធនាការចាក់វ៉ាក់សាំងបង្ការកូវីដ-១៩​ ជូនកុមារអាយុចាប់ពី ៣ឆ្នាំទៅ៥ឆ្នាំ។ការសម្រេចនេះគឺ ​បន្ទាប់ពីប្រមុខរាជរដ្ឋាភិបាលកម្ពុជា បានបញ្ជាក់ឱ្យក្រសួងសុខាភិបាលរៀបចំការ​ចាក់វ៉ាក់សាំងជូនក្រុមគោលដៅថ្មីនេះ ឱ្យបានឆាប់រហ័សបំផុតតាមដែលអាចធ្វើបាន។ តាមរយៈសារសម្លេងសម្ដេចតេជោ ហ៊ុន សែន នាយករដ្ឋមន្រ្តីកម្ពុជាកាលពីម្សិលម៉ិញ លើកឡើងថា គ្មានជម្រើសណាល្អជាងការចាក់វ៉ាក់សាំងនោះទេ។

សម្ដេចតេជោ ក៏បានសំណូមពរទៅអាណាព្យាបាល ជូនកូនៗរបស់ខ្លួនទៅទទួលការចាក់វ៉ាក់សាំង​កូវីដ១៩​អោយបានគ្រប់ៗគ្នា ខណៈតាមការប៉ាន់ប្រមាណ ​កុមារស្ថិតក្នុងអាយុ ​៣ទៅក្រោម៥ឆ្នាំ គឺមានប្រមាណ ៧០ម៉ឺននាក់នៅទូទាំងប្រទេស។

ការសម្រេចចាប់ផ្ដើមយុទ្ធនាការចាក់វ៉ាក់សាំងនេះ ​គឺទទួលបានការសាទរពីប្រជាពលរដ្ឋ ពិសេស​គឺអាណាព្យាបាល ​ដែលពួកគាត់មានកូនតូចមិនទាន់បានចាក់វ៉ាក់សាំង។ ​ពួកគាត់​ លើកឡើងថា មួយរយៈមកនេះ​ គឺពួកគាត់មានការព្រួយបារម្ភច្រើនចំពោះសុខភាពកូន ខណៈដែលករណីឆ្លងវីរុស​បំប្លែង​ថ្មីអូមីក្រុងកើតឡើង​ជាច្រើនរយករណីរៀងរាល់ថ្ងៃ។ ​ពួកគាត់ជាអាណាព្យាបាល នឹង​ជូនកូន​ទៅទទួលការចាក់វ៉ាក់សាំងឱ្យបានទាន់ពេលវេលា។

ក្រសួងសុខាភិបាល បានចេញសេចក្ដីប្រកាសព័ត៌មាន ដោយបញ្ជាក់ពីការចាប់ផ្ដើមចាក់​វ៉ាក់សាំង​ជូនដល់​កុមារអាយុពី៣ឆ្នាំ​ដល់ក្រោម៥ឆ្នាំ ប្រភេទ ស៊ីណូវ៉ាក់។ សម្រាប់​ឯកសារ​ដែលក្រសួង​តម្រូវ​ឱ្យភ្ជាប់ទៅជាមួយ គឺមានដូចជា សំបុត្រកំណើត​ ឬសំបុត្របញ្ជាក់កំណើត ​ឬសៀវភៅគ្រួសារ ឬសៀវភៅ​ស្នាក់នៅ ឬលិខិតឆ្លងដែន ​និងប័ណ្ណសំគាល់​ខ្លួនមន្រ្តីរាជការ ឬប័ណ្ណមន្រ្តី​ជាប់​កិច្ច​សន្យា​របស់ឪពុកម្ដាយ ​ចំពោះកូនចៅមន្រ្តីរាជការថ្នាក់ជាតិ៕អត្ថបទ៖ គឹមហុក