ប្រធានផ្នែកធនធានមនុស្សរបស់រដ្ឋាភិបាលអាមេរិក បាននិយាយថា រដ្ឋបាលរបស់លោកប្រធានាធិបតី Donald Trump មានផែនការកាត់បន្ថយបុគ្គលិកប្រហែល ៣១៧.០០០នាក់ នៅឆ្នាំ២០២៥ នេះ ដែលជាតួលេខខ្ពស់ជាងការប៉ាន់ស្មានពីមុន។ 

លោក Scott Kupor ប្រធានការិយាល័យគ្រប់គ្រងបុគ្គលិក ក៏បាននិយាយនៅក្នុងសេចក្តីថ្លែងការណ៍មួយថា រដ្ឋាភិបាលសហរដ្ឋអាមេរិក បានជួលបុគ្គលិកថ្មីចំនួន ៦៨.០០០នាក់ ក្នុងឆ្នាំ២០២៥។

តួលេខទាំងពីរគឺធំជាងការប៉ាន់ស្មានពីមុន ដែលលោក Kupor បានផ្តល់ឱ្យកាលពីដើមឆ្នាំនេះ នៅក្នុងបទសម្ភាសន៍ជាមួយសារព័ត៌មានរ៉យទ័រ នៅតួលេខ ៣០០.០០០នាក់ សម្រាប់បុគ្គលិកដែលចាកចេញ និង ៥០.០០០នាក់ សម្រាប់ការជួលថ្មី។

ការកាត់បន្ថយនេះគឺជាផ្នែកមួយនៃយុទ្ធនាការរបស់លោកប្រធានាធិបតី Donald Trump ក្នុងការបង្រួញកម្លាំងពលកម្មស៊ីវិលរបស់សហព័ន្ធ ដែលលោកនិយាយថា ច្រើនហួសហេតុ និងពុំមានប្រសិទ្ធភាពទាល់តែសោះ។ គួរឱ្យដឹងថា បុគ្គលិក ២,៤លាននាក់ បានធ្វើការឱ្យរដ្ឋាភិបាលសហរដ្ឋអាមេរិក នៅមុនពេលលោក Trump ចូលកាន់តំណែងជាលើកទីពីរក្នុងខែមករា ឆ្នាំ២០២៥នេះ៕