ឯកអគ្គរដ្ឋទូតជប៉ុន ប្រចាំនៅអង្គការសហប្រជាជាតិ (UN) លោក Kazuyuki Yamazaki បានផ្ញើលិខិតមួយច្បាប់ទៅអគ្គលេខាធិការ UN លោក Antonio Guterres កាលពីថ្ងៃចន្ទ (ទី២៤ ខែវិច្ឆិកា) ដោយបានបដិសេធសំណើរបស់ចិន ដែលស្នើឲ្យនាយករដ្ឋមន្ត្រី លោកស្រី Sanae Takaichi ដកការកត់សម្គាល់ ជុំវិញបញ្ហាយថាហេតុ នៅកោះតៃវ៉ាន់។

ក្នុងលិខិតនោះ លោក Yamazaki បានសង្កត់ធ្ងន់ថា គោលនយោបាយជាមូលដ្ឋានរបស់ប្រទេសជប៉ុន គឺជាយុទ្ធសាស្ត្រផ្ដោតលើការការពារតែម្យ៉ាង។ លោកបានផ្ដល់ហេតុផលថា ការអះអាងរបស់ចិន ដែលលើកឡើងថា ជប៉ុននឹងប្រើសិទ្ធិការពារខ្លួន ទោះបីជាមិនមានការវាយប្រហារដោយប្រដាប់អាវុធក៏ដោយ គឺមិនត្រឹមត្រូវនោះឡើយ។

ជាមួយគ្នានេះ លោក Yamazaki ក៏បានបញ្ជាក់ផងដែរថា ជំហររបស់ប្រទេសលោក ចំពោះកោះតៃវ៉ាន់ មិនបានផ្លាស់ប្តូរទេ ចាប់តាំងពីមានសេចក្តីថ្លែងការណ៍រួមជប៉ុន-ចិនឆ្នាំ១៩៧២ នៅពេលដែលប្រទេសទាំង២ បានធ្វើឲ្យទំនាក់ទំនងការទូតមានប្រក្រតីភាពឡើងវីញ ដោយបន្ថែមថា ទីក្រុងតូក្យូរំពឹងថា បញ្ហាកោះតៃវ៉ាន់ នឹងត្រូវបានដោះស្រាយដោយសន្តិវិធី តាមរយៈការសន្ទនា។

ដោយចង្អុលបង្ហាញថា ចិនបានកាត់បន្ថយការផ្លាស់ប្តូរ រវាងប្រជាជន និងប្រជាជន និងសេដ្ឋកិច្ច ជាមួយជប៉ុន ក្នុងនោះរួមទាំងពាណិជ្ជកម្មផលិតផលអាហារសមុទ្រផងដែរ លោក Yamazaki បាននិយាយថា ជប៉ុននឹងដោះស្រាយបញ្ហានេះ ដោយស្ងប់ស្ងាត់ តាមរយៈការសន្ទនា។

គួរបញ្ជាក់ថា ជប៉ុន និងចិន បានជាប់ក្នុងជម្លោះការទូត ចាប់តាំងពីទីក្រុងប៉េកាំងបានរិះគន់យ៉ាងខ្លាំង ចំពោះការឆ្លើយតបរបស់លោកស្រី Takaichi ទៅនឹងសំណួររបស់សភា កាលពីថ្ងៃទី៧ ខែវិច្ឆិកា ដែលលោកស្រីបាននិយាយថា ការវាយប្រហារយោធាលើកោះតៃវ៉ាន់ អាចបង្ហាញពី «ស្ថានភាពគំរាមកំហែងដល់ការរស់រានមានជីវិត» សម្រាប់ជប៉ុន។ ការកត់សម្គាល់របស់លោកស្រីត្រូវបានបកស្រាយថា ជាការបង្ហាញថា រដ្ឋាភិបាលរបស់លោកស្រីអាចអនុញ្ញាតឲ្យកងកម្លាំងស្វ័យការពារចាត់វិធានការ ជាការគាំទ្រដល់សហរដ្ឋអាមេរិក ប្រសិនបើចិនដាក់ការបិទខ្ទប់ផ្លូវសមុទ្រ នៅកោះតៃវ៉ាន់ ឬចូលរួមក្នុងទម្រង់នៃការបង្ខិតបង្ខំផ្សេងទៀត៕