ស្ថាប័នស្ទង់មតិ Odoxa នៅប្រទេសបារាំង បានព្យាករជាលើកដំបូងថា មេដឹកនាំស្តាំនិយមជ្រុលវ័យ ៣០ឆ្នាំ លោក Jordan Bardella នឹងឈ្នះការបោះឆ្នោតប្រធានាធិបតីបន្ទាប់ ដែលគ្រោងកើតឡើងនៅឆ្នាំ២០២៧ ទោះបីជាគូប្រជែងរបស់លោក គឺជានរណាក៏ដោយ។

ដោយបានស្ទង់មតិលើមនុស្ស ១.០០០នាក់ នៅចន្លោះថ្ងៃទី១៩ និងទី២០ ខែវិច្ឆិកា ស្ថាប័ន Odoxa បានរកឃើញថា ប្រមុខបច្ចុប្បន្ននៃគណបក្សស្តាំនិយមជ្រុល គឺ National Rally (RN) និងជាអ្នកបន្តវេនពីមេដឹកនាំយូរអង្វែង គឺលោកស្រី Marine Le Pen នឹងទទួលបានសំឡេងច្រើនជាងបេក្ខជនផ្សេងទៀត ប្រសិនបើការបោះឆ្នោតប្រធានាធិបតី ត្រូវបានធ្វើឡើងនៅក្នុងសប្តាហ៍នេះ។

ស្ថាប័ន Odoxa បានឲ្យដឹងថា ដោយអាស្រ័យលើគូប្រជែងរបស់លោក នៅជុំទី១ លោកនឹងទទួលបានសំឡេងឆ្នោត ៣៥ភាគរយ ឬ ៣៦ភាគរយ ខណៈដែលលោកនឹងដណ្ដើមបានជ័យជម្នះលើបេក្ខជនផ្សេងទៀតគ្រប់រូប ពេលចូលដល់ជុំទី២។

តែយ៉ាងណាក្ដី នៅក្នុងរបាយការណ៍ដែលបានចេញផ្សាយអមដោយលទ្ធផលស្ទង់មតិនេះ ស្ថាប័ន Odoxa បានបញ្ជាក់ថា៖ «ជារឿងគួរឲ្យសោកស្ដាយ ទាំងសម្រាប់លោក Jordan Bardella និងអ្នកគាំទ្ររបស់លោក និងជារឿងល្អ សម្រាប់អ្នកផ្សេងទៀត នោះគឺថា ទោះបីជាលោកមានសិទ្ធិខ្ពស់ជាងគេ នៅក្នុងការបោះឆ្នោតប្រធានាធិបតីដែលនឹងកើតឡើងច្រើនខែទៀតក៏ដោយ ក៏វាមិនមានការធានាថា លោកនឹងទទួលបានជោគជ័យនោះឡើយ»។

កាលពីមុន លោកស្រី Marine Le Pen និងឪពុករបស់លោកស្រី គឺលោក Jean-Marie Le Pen អ្នកទាំង២ បានតទល់នឹងសម្ព័ន្ធភាពនយោបាយយ៉ាងទូលំទូលាយ ដែលបានយកឈ្នះលើអ្នកទាំង២ ចំនួន ៣ដង ក្នុងការបោះឆ្នោតជ្រើសរើសប្រធានាធិបតីជុំទី២៕